بَس نُوخذ الزُّبدة من الحليب ونسوّي منُّه كميات كبيرة، نجمع الجارات ونحُطّ الزّبدة في طاسيّة كبيرة، ونحُطّ الطّواسي على نار حَطب على اللَّدَايا اللّي هي ثلاث دْمُوس وَسَط، ونحُطّ الطاسيّة أو القِدر على النار، وبنحُطّ في الطاسيّة جَريشة قمح، وهي القِشْدة وحَوايِج السَّمنة من الحُلبة والكُركم وبنحرِّكها حتى السمنة تذوب، وكلّ ما يِطلع على الوجه رَغوة نقشُطْها، وبَسّ تبلِّش الزُّبدة تُوخِذ لُونها اللِّي هو الأصفر بِنّزّلْها من على النّار، وبنُترُكها لمّا تُبرُد ونصُبّ السّمن في سْطُول، وبعدين بِنبِيعُه أو نْخَلِّيه مُونِة للدَّار، والقِشْدِة بِنوَزِّعها على الجَارات وبْيُوت العُربان.

في البداية بِنجِيب  الحليب ونِغليه عالنار، وبعد ما يِغلِي بنرَوّبُه؛ يعني بنحُطّ عليه لَبن رايب وبنُتُركه 4 ساعات، وبعدها بَقسِم الرُّوبَة قِسمِين، وبحُطّ قِسم في الثلاجة حتى يكون بارد، والقسم الثاني بطلعُه برَّا، وبشيل عنُّه الغَطَا وبحُطّ عليه قطعة قماش عن الغَبَرة، وبعدين بحُطّهن في الخَضّاضة يعني نُص ساعة،  وبعدها بِنبَلّش نِطلِع الزُّبدة، وعلى شان أجمع الزُّبدة بحُطّ ثلج، ولمّا نتأكّد إنّه بلَّشَت الخَضّة تِطلع رغوة بِتكون خِلصَت الخَضّة وأخذنا زَفَرها، وبعدين بحُطّ لَبَن الخَضّة في قِدر على الغاز، ولمّا تبيِّن المَيّ بِندِيرُه في المِخْلاة، وبنُترُكْها تِتْصَفَّى شْوَيّ.

شُوربة المْلاح أكثر الناس بطبُخُوها وقت المغرب مع تَروِيحة الرِّعيان والحصَّادين، بِسوُّوها في طناجر كبيرة، وهي عَدَس مَجروش بفتُّوا فيها خبز بلدي أو خبز صاج، وبِقَفّرُوها في زيت زيتون، وبحُطُّوا على وجهها البصل وبنِقلِيه، وصِحّتين وعافية.

بَس الناس تُدرُس القمح بتِيجي المَرَة بِتصَوّْلُه من الحَصُو والتّراب، وبعد ما تنظّفُه المَرَة بُوخذُه الزّلمة عالبابور وبِطحَنُه، وبَس يجِيبُه بتحُطُّه المَرَة في الكْوَارَة وبتصِير تطُول منُّه الخِشِن، ولِيه غْطَاة بِنسمِّيها الباطِيّة، وبَس تِعجن المَرَة العجينة بمَيِّهْ فاترة وملح، تْخَلِّي العجينة شويّة مِشان تِرتاح، وبعدين تُوقِد النار وتحُطّ اللَّدَايا وترَكّب الصاج عليهن، وتخَلِّيه لَمَنُّه يِحمَى، وبعدين تجِيب العَجينة في المْخَمّر وتحُطّ من الباطِيّة شويّة طحين، وتصير تقطِّع العجينة دحَابِير وترُقّها، وتصِير تلُوح فيها على إيدها لَمَنْها تصِير رُقّ السِّيكارة وتحُطّها على الصّاج،

خُبز الشّْرَاك بِنسَوّيه من طحين القمح السّادَة بدون ما يِنخلِط طحين أبيض، وبنحُطّ الطحين في صحن كبير، وبنحُطّ عليه مَيِّهْ شْوَيّ شْوَيّ وبِنصير نِعجِن فيه، وبنخَلّي العجين يِرتاح ساعة أو نُصّ ساعة، وبنقَطِّع العَجينة على شكل كُرات متوسّطة دائرية، وبنحُطّها على الصّاج الحامِي، وبنِقِلبُه على الجَالِين مِشان يِتحَمَّر، وبنكمِّل باقي العجينة بنفس الطريقة، وأهم أكلة بنحُطّ عليها شْراك هي المنسف.

كنّا كل ربيع مِنرُوح على الجبال أو البَطِين مِشان نلَقّط الزَّعتر الأخضر، وبِنظَلّ نِمشي مسافات مِشان نلمُّه ونحُطُّه في شوال، وبعدين بنِغِسلُه وبِنّظّفُه من التراب مِشان نْنَشّفُه ونحُطُّه في محلّ نظيف في الشّمس، وبعدين بنحُطُّه في صحن كبير مِشان نِخلِط لِيه باقي المواد، وبِنجِيب قمح وبْنِقليه على النار، وبعدين بنحُطّه على الزّعتر وبنحُطّ معاه شويّة ملح، وبِنجِيب طاحونة الحَجر (الرحى)، بنِغسلها وبنحُطّها في الشمس مشان تِنشف، وبنحُطّ تحت الطاحونة فراش نظيف، وبنبدأ نطحن حتى يِخلَص كلّ الزعتر، وبِنجيب بعد هِيك المُنخُل مِشان يكون ناعم، وبنحُطّه في صحن عميق وبنفُركُه بالزيت، وبنحُطّ عليه السّم

بنجِيب البندورة وبنِغسلها وبعدين بنقطِّعها لنُصِّين وبنحُطّها على مَشبك، وبنحُطّ الجهة المشقوق وجهها لَفُوق مشان نرُشّ عليها ملح، بنحُطّها في الشمس وبنغطِّي عليها في شاش، في الليل بِنفَوّتها جُوّا، بِنظَلّ نعمل هيك لأسبوعين لَحَدّ ما نشوفها نِشفت وصارت قاسية، بعدين بِنجيب مرتبانات بنحُطّهن فيها، وبنحُطّ على وجهها زيت، وبنخلّيها في الثلاجة لمّا نِحتاج بِنطُول منها.

بِنسَوِّيها من السَّمِيد وهو أساسها وبنخلط معه السكّر وبنِعجِنها في اللّبن الرايب والسمنة، وبنحُطّ عليها كربون وبَكِنج باوْدَر، وبنِخلِطها كلّها مع بعض، وبِنجِيب الصّينيّة وبنِدهَنها طحينة وبِنْمدّْها فيها، وبِنقَطّعها قبل ما نفَوّتْها الطّابون أو الفرن، وبِنكون محَضّرين لِيها قَطْر وهو (ماء سُكّر)، وبنحُطّ فيها سمنة بلدية لأنها بِتخَلّي طعمها غِير، بَس تبرد الهريسة بعد ما نِطلعها من الفرن وتِتحمَّر، بنحُطّ عليها القَطر لأنّه إذا حَطِّيناه وهي ساخنة بتِتْفتَّت، وكنَّا زمان نظَيِّفْها في العِيد.

بِنجِيب الطحين البلدي وبْنِعجنُه، وبَجَهّز الصّاج يا إمّا على الحَطَب يا إمّا على صاج الغاز، بَظَلّ أرُقّ فِيه لمَّا يِحمَى الصّاج عليها، وبعد ما يِستوي الصّاج بَكُون مْجَهِّز حَطب ومْوَلّعُه لمّا يصِير جَمر وبَقْلِبها  عليه، ولمّا يصِير لُونها أسود بكُتّْهَا وبَفُتّْها بحليب غنم، وبحُطّ عليها سمنة بلدية وشويّة سكَّر. 

هذا المْلَبَّن بِنجِيب العنب بتِغِسليه وبِتنَشّفيه، وبِتحُطّي عليه مَيّ وبتحُطّيه في طنجرة على النار، وبتجِيبي الطحين أو السّميد وبِتْخلّيه يكون وقت هالعنب بِغلِي على النار، والطّحين بِتْظَلّي تُوخذِي منُّه وتُفُرْكي في إيدكِي لَمَنُّه تْنَخّليه، وبِتجِيبي وَحدة وبِتظَلّ تْحرِّك في العِنب في الطنجرة، ووحدِة بتحُطّ في زُبدِيّة عليه طحين يِتصَفّى في مَيِّةْ العنب.