المكونات: سفرجل, سكر, ماء. 

نختار حبات السفرجل الناضجة (لونها أصفر)، نغسلها جيدا ونقشرها ونقطعها إلى قطع صغيرة على شكل مكعبات, وتوضع في طنجرة ويرش عليها سكر وتبقى لثاني يوم.

يكون السكر قد ذاب, يضاف إليه ماء ويوضع على نار هادئة لمدة ساعتين ويحرك باستمرار لكي لا يحترق أو يلتصق بالقاع، نستمر بالتحريك إلى أن يصبح لونه بنفسجي (خمري مائل للأسود)، ثم يترك إلى أن يبرد، ثم يفرغ في مرطبانات ويغطى بطبقة من الزيت للحماية.

نخلي الحبة زي ما هي، نحط كل التوت بالطنجرة زي طنجرة التيفال، ونرش عليها السكر ونغطيها من الليل لثاني يوم الصبح، بعدها نحط الطنجرة على نار هادية ونتركه حتى يستوي ويطبخ على الأخير، وبعدها لما يبرد نفرغه بمرتبان الكزاز.

نجيب التفاح، نقشره وننقعه بالشيد (الكلس) عشان الحبة تقرمش، ننقعه من اليوم لثاني يوم الصبح، بعدها نغسله منيح عن الشيد ونسلقه بالمي حتى يستوي، وعلى جنب نكون حاطين بالطنجرة مي وسكر، بعدها نجيب التفاح ونسقطه بالمي، نتركه على نار هادية حتى يستوي، أو أول ما نغسله من الشيد نحط عليه سكر وبعدها بساعتين نحطه على نار هادية حتى يتغير لونه ويستوي، لما يبرد نفرغه بالمرتبان الكزاز.

لما نعمل تطلي البطيخ يكون اللي بالنص، بين اللب الأحمر وبين القشرة الخضرا، يعني القشرة البيضا نقطعها وننقعها بالشيد من الليل لثاني يوم الصبح، بعدها نغسله منيح عن الشيد لأنه سام، بعدها نغلي المي ونسلقه، بعدها نشيله ونصفيه من المي، على جنب نكون غاليين بالطنجرة مي مع سكر حتى يصير شوي مثل القطر، نحط فوقه البطيخ ونتركه حتى يستوي، وبعد ما ينطبخ ويتغير لونه نتركه لما يبرد، بعدين نفرغه بالمرتبان الكزاز.

نجيب حب الباذنجان اللي يكون صغير، أصغر من حجم المقدوس، ما يكون فيه بزر، نغسله بعدها، ثم نقشره، وبعدها ننقعه بالشيد (الكلس) من الليل لليوم الثاني، بعدين نغسله منيح من الشيد، لأن الشيد سام، بعدها نحط حب الباذنجان بالمي ونسلقه حتى يستوي، بعدها نصفيه من المي، وعلى جنب نكون عاملين قطر من سكر ومي وغالييهن غلوتين ثلاثة حتى يذوب السكر طبعا، بعدها نحط الباذنجان اللى صفيناه بالقطر، ونتركة على نار هادية لمدة ثلاث ساعات تقريبا ونغطيه، ونكون حطينا بكل حبة باذنجان حبة لوز مقشر ومسلوقة من قبل، بعدها لما يبرد نحط نكهة جوز الطيب أو هيل مطحون ونفرغه بالمرتبان الكزاز ونحطه بالثلاجة.

عند تخزين النبيذ يجب مراعاة إغلاق الزجاجة جيدا لمنع التهوية, لأنه بمجرد دخول الهواء يتحول إلى خل، أيضا يجب أن يخزن في مكان معتم ورطب، وأيضا يجب أن تخزن الزجاجات مائلة وغير مستقيمة، كلما طال تخزينه كلما كان أفضل, لذلك يجب الانتباه لتخزينه جيدا, لأنه حساس جدا, أي غلطة صغيرة قد تتلفه تماما.

كانوا النسوان في موسم الملوخية في الصيف كل مرة وحدة تشتري ملوخية بعروقها بكميات كبيرة من سيارة كانت بتلف على البيوت، ويتجمعن عند الجارة اللي بتشتري الملوخية وينقبنها من عروقها، ويظلن بالساعات وهن بسولفن مع بعض عن الأولاد والطبخ والقرايب... على بين ما يكملن تنقيب بتكون الجارة عامله اشي حلو، أو طبخة، بس يكملوا التنقب يتغدن مع بعض وكل وحدة بتروح على بيتها، لكن هاي العادة خفت كثير، صارت النسوان يشترن ملوخية منقبة من السوق.

بنجيبها من السوق منقبة خالصة، إذا بيها ورقة خربانة أو عيدان بنقيمهن، وبنغسلها وبنشفها من المي، وبنخزنها بطريقتين: يا بنشفها بالشمس، يا بنقليها وبنحطها بالفريزر.

بنجيب اللبنة جاهزة، بنملحها مليح وبنحطها بخريطة لثاني يوم على شان ينزل منها المصل، وبعدين بنحطها بجاط وبنعجنها مليح، ةيعدسن بنجيب مطربان قزاز حجمه وسط وبنعبيه بالزيت لنصه، وبعدها نوخذ اللبنة ونبدا ندحبر بيها، بنسويها ازرور ازغار، وكل زر بندحبره نحطه بالزيت، نظل ندحبر باللبنة حتى نعبي المطربان، وبنخلي الزيت يغرق اللبنة على شان لما نخزنها ما تخرب، وبعدين بنسكر المطربان مليح حتى لا يدخل الهوا، ونخزن مطربانات اللبنة بمكان جاف بحرارة الغرفة بدخل الهوا وبعيد عن الشمس، بنخزنها للشتاء ونقدمها على الفطور والعشاء.

يصنع دبس الرمان من الرمان الحامض، إذ نقوم بفتح الرمانة إلى قسمين، ونقوم بفرطه إذ نستخرج فقط حب الرمان.

نقوم بعصر الرمان ونصفيه، فقط العصير، بعد ذلك نضع عصير الرمان على الغاز ونضع ليمون وقليلا من السكر ويبقى على الغاز حتى يغلي.

ثم يترك حتى يبرد ويوضع في زجاجة ويوضع في الثلاجة، ويستعمل دبس الرمان كبديل لليمون للسلطات والفتوش.

الباميا لأنها لها موسم، لهيك نحفظها، والباميا نوصي تاع الخضرة أو من بكمات الخضرة، تكون بلدية وخضراء ونظيفة، المهم لما نشتريها نطبخها والنص الثاني نجيب الميبرة وخيط الفتلة لأنه مانع وكويس، ونصير ندخل خيط الفتلة بكل حبة باميا ونعمل زي العقدة، وكل حبه وحبة بينهن فراغ، طبعاً نكون نغسلها، في ناس ما بتغسلها بتخليها زي ما هي، ونتركها بالشمس حتى يجف زي الحطب، مش طريات، وبعدها نقيمهن ونعلقهن بزاوية المطبخ.