تقول الحجّة أمّ مهدي: نجِيب المِعجان ونحُطّ فيه طحين قمح، نطحنُه على إيدينا ونحُطّ عليه سَحْلة ميِّهْ وشويّة مِلح، ونعجِنْهِن مع بعض لحَدّ العجينة ما تِمْسك بعضها وتصير طريّة بَس مُو مَرَقة؛ لازم تكون قاسية شويّة مع طَرَاوة، وبعدين نِفرِدها بسِدِر كبير ونرُقّْها لَحَدّ ما تصِير زيّ الدُّوِّيرة، بس لازم تكون ثَخِينة، وبعدين ندِيرها على النار، ونهِيل الجَمر فوقها ونخلِّيها لَحَدّ ما تِستوي، وبعدين نقطِّعها بسِدِر أو صينية، قِطَع زْغِيرة، ونصُبّ فوقها حليب المِعزى، ونفتّهِن مع بعض، ونصُبّ عليها سَمن نسوِّيه على إيدينا في البيت بلدي وناكُلها.تقول الحجّة أمّ مهدي: نجِيب المِعجان ونحُطّ فيه طحين

بِنجِيب لَبَن الجَميد وبْنُمُرْسُه وبْنِغلي بندورة لحالها وبِنْحُطّْها على اللَّبَن، وطبعًا بنكون مقَلّيِين جاج بلدي من عِنّا، بنِذبَحُه وبِنّظّفُه وبنِقْلِيه في سَمن وبَصَل وبِنْحُطّ عليه اللَّبَن والبندورة المطبوخة، وبِنْكُون مجهّزات عجينة يابسة شديدة بدون خميرة، وبنِخِبزُه في الطّابون، بعدين بِنْفِتُّه ناعم وبنِفْعَص فيه وبنحُطّ عليه اللَّبَن، وبِنظَلّ (نِفْعَص) لمّا يصِير مِثل الهِيطَلِيّة، وفيه ناس بِحِبّ الجاج مع اللَّبن، وفيه ناس بِحِبُّه لَحالُه نْحَمّرُه إِلُه في الطّابون.

وبَسّ نجَهِّز الفَطيرة بنْحُطّها في سِدِر وبِنْحُطّ عليه الجاج وبنشَرِّب سَمن بلدي.

طِلِّي يا جِدّة، نفس طريقة فَطيرة اللَّبَن؛ بِنكُون مْجَهّزين العَجينة اليابسة الشديدة وبدون خميرة، وبنِخْبِزها في الطابون، وبعدين بنفُتّ الخُبز الناعم وبنِفْعَص فيه كثبر لمَّا يصِير مِثل الهِيطَلِيّة، وبِنكون غاليِين حليب الغَنم وبنحُطّ عليه سُكّر قدّ ما وِدْنا، وكل واحد حَسَب ما بِحِبّ، وبِنْدِير الحليب على الخُبز وبنحرِّكها كوَيّس، وبنحُطّْها في سِدِر وبنْشَرِّب السّمن البلدي، وهذه الفطيرة بِتصِير بدون جاج ولا لحم.

بنُوخذ الزيتون المِستوي يعني اللّي حَلّ قْطَافُه من عالشَّجَر، وبنُنْشُره في الشّمس لمدة أسبوع أو أكثر حتى يِسْوَدّ لُونُه، وبنحُطُّه فوق منبَسَط صخري في حَدُّه يكون قناة، والمنبَسَط هو (حوض مَحفور في الصّخر)، وبِنْدَخلُه فيه شْمَال ويَمين ولَقِدَّام ولَوَرا (أمام، خَلْف) فوق الزيتون، وبِنظَلّ نُدْرُس ونُهْرُس فيه لمَّا يْسِحّ منُّه الزيت ويْسيل من القناة على المِصْفاة، وبحُطُّوه على النّار تيِغْلَى، وبنُقْلُوا الزيتون اللّي ظلّ فيها، وبِتْسَوَّى كُرَات وبِضْغَطُوها، ويْسَمُّوه (زِيت طْفَاح)، وبِعَبُّوه في أشياء نظيفة.

بِنجِيب الحليب وبِنذَوِّب فيه قِطع (الماه)، وهذه الماه هي الحليب الموجود في مَعِدة الخروف أو الجدي الرضيع، بعد ما نِذبح الجدي أو الخروف تُؤخذ مِعِدته وبِنْجَفّفها في الشمس وبنِحفَظها لمّا نِحتاجها، ويتركوا الحليب فترة بعد ما نضِيف عليه حتى يتجبَّن ثم بنحُطّ الجبنة في أكياس قْماش مِشان المَصْل يسِحّ منها، وبنحُطّ فوقها حجر ثقيل عشان المَيّ تسِحّ منها، وبعد ما تسِحّ بنحُطّها في جاط وبِنْرُشّ عليها مِلح وبِنْخَلّيها على بين ما تِقسَى، وبعدين بِنْقَطّعها وبنحُطّها في مَيّ مغليّة وبنحُطّ عليها (المَسْتَكَة)، وهي مثل حَبّات البَخُور، وفيخ ناس إلها مِحلب أو قزحة، وبس تُبْرد بنِحْفظها في مَطربانات

السّمن البلدي ما يميزه رائحته الزكيّة وطعمُه الخاص بسبب الأعشاب البريّة التي تُوضع عليه، ويُستخرج السمن البلدي من الزُّبدة البلدية التي تستخرج من عملية خَضّ اللَّبَن. وحين سألنا الحجّة فضّة قالت لنا:

إحْنا بنْقَشّد الزُّبدة عَشان تصِير سمن بلدي.

أول إشي بنحُط الزبدة على الغاز وبنذوِّبْها وبنخَلِّيها تُركُد هناك، وبِنقوم بِنجِيب مِخْشَانة أو مُنْخُل بِنَّخِّل عليه الزّبدة لمّا تُرْكد وبنِقْطفها (قَطْف)، وبنحُطّها في هالطّاسة وبنحُطّها عالمِركب وبنحُوسْها، وعاد اللَّبَن اللِّي طِلع منها هناك بِنَّزّلُه وبنحُطّ عليه ثلج لحالُه.

بِتْسَوِّي تَطْلي التِّين في الدُّور، وبِتْجِيبي لِيه ثلاث كيلو تِين وبتِغِسليهن وبِتْنَظّفيهن من الوَسَخ والغَبَرة اللّي عليه، وبتحُطّيهن على النّار لَمَّن يصِير لونُه غامق يعني قريب للُّون الأشقر، وبِتكُوني حاطّة علية كمية كبيرة من السكَّر، وبعدها بتِطْفي النار تَحتِيه وبتُترُكِيه لَمَّن يُبْرُد، وبِتفرّغيه في المَطرَبانات وبِتْخَزّنيه، وكل ما تِجُوا وِدْكُوا تُوكلُوا منُّه بتحُطّي في صَحن وبتِرجَعي بِتْسَكّري غَطَاة المَرْطبان زِين عَشان ما يِجِي عليه غَبرة ويِتوَسّخ، وصحتين وعافية.

هي إحدى الأكلات الشعبية، وتتكوّن من الدّجاج والبُرغل والطَّحين.

نقوم بنِخلِط الطّحين مع البُرغل، وبنِعْمَل لُه فَرْك بين الأصابع، وهناك مِصفاة خاصّة لعمل البُرغل نقوم بفَرك الطّحين فوقها.

نقوم بوضع الدجاج في الطنجرة خاصة، ونضع معه البصل ونقليه، ونضع صَلْصَة البندورة، ثم نضع فُوق الطنجرة صينية خاصة بها ثُقوب نَضَع بها الطحين بعد أن أصبح دوائر صغيرة.

نحُطّ الصينية على بُخار طنجرة الدّجاج ونتركها حتى يستوي، ثمّ تِتْنَزّل الصينية ونِفْرِد المَفتول فوق السِّدر، ونقوم بوضع الدجاج فوق المفتول، ونحُطّ الصَّلصة فوق الدجاج والمَفتول ويقدّم جاهز للأكل.

بقُوم أجِيب القمح وبَشُرُّه لمّا يِنْشَف من الماء شويّة، بعدين بَجِيب (الجُرن أو الجَرّة) وبَحُطّ القمح فيه وبَدُقُّه، وبعدين بَطَلّعُه بَشُرُّه شويّة وبَذَرّيه من القِشرة، بَرُدّ بَحُطّه في طَنجرة لمّا يِنسَلق وبَزِيد عليه اللّبَن المَمرُوس، وبَكون سالقة عدس، والعدس بِنْحَطّ قبل اللَّبَن، وبِنْخلِّية يُطبُخ مع بعضُه، ولمَّا تحِسّ إنّه استوى بِنّظّفُه وبِنجِيب البصلة وبنِقْدَحها مع سمنة بلدية لمّا يستوي، وبنَاكُل على شَكلين؛ يا إمّا بتُوكلِيه شُوربة أو إنك بِتْجِيب خُبز بلدي (عَوِيص) وبِتفتُّه فيه وبتزيده شوية سمنة وبتوكله.

المْجَدَّرَة نوعين: مجدَّرة البُرغل، ومجدَّرة الرُّزّ. مجدَّرة البُرغل بنِسْلِق العَدس وبِنْكون ناقعِين البُرغل، وقبل ما يِستوي العدس بِشْوَيّ بِنْكون حاطِّين عليه البُرغل والسّمنة ومَيِّة، وبِنْخَلّيهن يِغْلِن لمّا يِسْتون، وبْتِتنَشّف المَيِّة من عليها، وبنِقْدَح بَصَلة مع زِيت زيتون وبِنْحُطّها عليها وسلامتكِ.

والمْجَدَّرَة الثانية مجدّرة الرُّزّ، بنِسْلِق العَدَس وبَس يْقَرِّب يِسْتَوى بِندِير عليه الرُّزَّات وبْنُخْلُط العَدَس والرُّزّ، وبِنْحُطّ شوَيّة سَمنة بلدية، وبِنْغَطّي الطنجرة لَبِين ما يِسْتَوي، وبَس يِستَوي بنِقْدَح البَصَلة مع السّمنة البلدية وصحتين وعافية.