بنُوخذ الزيتون المِستوي يعني اللّي حَلّ قْطَافُه من عالشَّجَر، وبنُنْشُره في الشّمس لمدة أسبوع أو أكثر حتى يِسْوَدّ لُونُه، وبنحُطُّه فوق منبَسَط صخري في حَدُّه يكون قناة، والمنبَسَط هو (حوض مَحفور في الصّخر)، وبِنْدَخلُه فيه شْمَال ويَمين ولَقِدَّام ولَوَرا (أمام، خَلْف) فوق الزيتون، وبِنظَلّ نُدْرُس ونُهْرُس فيه لمَّا يْسِحّ منُّه الزيت ويْسيل من القناة على المِصْفاة، وبحُطُّوه على النّار تيِغْلَى، وبنُقْلُوا الزيتون اللّي ظلّ فيها، وبِتْسَوَّى كُرَات وبِضْغَطُوها، ويْسَمُّوه (زِيت طْفَاح)، وبِعَبُّوه في أشياء نظيفة. وبَواقِي الزيتون وقِشْرُه بيُنشُروه عشان يِنْشَف وبِستَعملوه في النار (يسمَّى "جِفْت") بِوَلّعُوا النار فيه زَيّ الحَطَب، وفيه ناس كانوا يُعْصُروا الزّيت في طريقة ثانية؛ بِيْجِيبوا رَحَى وبُحُطُّوا فيها الزيتون وبِشِدُّوها في الدّوار، وبِتْصِير تْدُور ويْسِحّ الزِّيت.