يأتي اسم القليّة من القَلِي، وتحدّثنا المخبرة: إنّها قمح بنِقليه على النّار وهو في الصاج، لمّا يِستوي القمح بصِير اسمه قليّة بِنشِيلُه وبنِطحن القليّة على البابور، وبنحُطّها بقِدِر بمَيِّه وسُكّر وبِنحوسُه حتّى يِثقل ويِجمد، وبنحُطّه في صحون وبِندِير فوقُه سمن بلدي. هاي بتصِير في العْرُوس خاصة يوم النصّة.

اللُّوف عشبة خضراء اللون موجودة في الوِديان وممرّات السيول، وتحدّثنا المخبرة عن اللُّوف: كنّا نلقّطه من الوديان مثل وادي ابن حمّاد وسيل الكرك والموجب. واللُّوف ورقُه عريض بنلقّطُه وبنَّشْفُه في الشّمس، وبعد ما ينشف بنُمْرُس عليه اللَّبن، بكون لبنُه ثقيل، وبَس تصير المَريسة جاهزة بِندِير عليه أوراق اللُّوف وبنترُك اللَّبن يُطبخ لما يِخثر، وهاي الأكله فيها فايدة كثيرة للجسم كأنّك بتُوكل لَحم، وفيه مَثل قديم: (طنجرة اللُّوف عن خروف).

هي قمح يِسِلقنّه النِّسوان وبِسوّنّه سَلِيقة، وهاذِي السّليقة بُوخذِن القَمح بعد ما يِنشَف، وفيه بُكُون (جُرن) في القرية، بِلْتَمّن النِّسوان وبُدُقّن القمح، وبعدين بِخِزننُّه بَس يجِن يُطبخن المدقوقة من العدس والحمّص والقمح واللّبَن الجَميد، وبِنكون خالطِين العدس مع القمح، وبنُتُركُه على النّار وبِنخَلّيه لمّا يقرِّب يِستوي بنحُطّ الحمّص المَسلوق، وبنحُطّ اللَّبن الجَميد وبِنخَلِّيه يِعْقِد، وبِنكُون مْذَبّلين البَصل في السّمنة البلدية، وبنحُطّْها على اللَّبَن شْوَيّ وبنِطْفي تحتها، وبعدين بِنقَدّمها وفيه ناس بفِتّ فيها وبقَفِّرْها في السمنة البلدية، وتعالي وتْفَرّجِي.

القهوة المُرّة تُعتبر من أبرز وأهمّ العناصر التراثية عند البدو في الأردن منذ وقت طويل، فهي تعتبر المشروب الرسميّ عند البدو في الصباح والمساء، وإذا البدوي لم يشربها يشعر بالصُّداع وهذا ما يقولوه.

بِنْجِيب حَبّة هالتِّين وبتِفْلَعِيها فَلِع، وبتحُطِّيه في شَرشف، وبتُنُشْرِيه عالسَّطح تحت الشمس لَمَنُّه يِنْشَف كُلَّيَاتُه، وبعدين بتِجِي وبتظُبُّه في هِدِم عَشان ما يِنشَف كثير، يعني يصِير قاسي كثير، ويظَلّ عادة طَرِي، وسلامتكِ والعافية.

هو نوع من أنواع الخُبز لكن بِنْسَوِّيه إنُّه عادة دينية، يعني بِنجِيب طَحين بلدي مُو مْخَلّط، وبتِعِجنُه المَرَة، بِتكون العَجينة جامدة مِشان يِتْقَطَّع كويِّس مع المَرَة، بِكُون تَقطيعُه على شكل وجوه يعني قْرَاص صغيرة مو مثل رغيف الخبز، يعني أزغَر شْوَيّ، وبُكُون فيه عالنّار اشم (وهو قطعة خَشب صغيرة مربَّعة عليها كتابة)، وبنِظْغَط فيها على العَجينة من النُّصّ مِشان الكتابة على الخبز، وبعد ما نِخِبزُه مِنْوَدِّيه على الصَّلاة مِشان الخُوري يقدِّم منُّه في الصلاة، والقُدّاس في العادة على اسم الأموات اللِّي بُخُصُّوا كل واحد، وبَس نْوَدِّيه معه ورقة عليها أسماء الميّتين اللّي بخصُّوه مِشان يُ

هي أكلة شعبيّة تتكوّن من جَريشة القمح، وتُطبخ مثل الأرز تقدّم مع المَنسف في المناسبات الاجتماعية.

العِيش من الأكل المهم في منطقة الأغوار الجنوبية، ويُستعمل مثل الأرز على المنسف في حفلات الأعراس والعزايم الخاصة.

الفَطِيرة المْجَلّلة

القُرص

العربود أكلة تراثية عند البدو منذ القِدم تعتبر سهلة وبسيطة، وتقول الحجّة أم مهدي:

نعجِن العجينة من طحين القمح والميِّة، ونحُطّ عليها شويّة ملح، ونظلّ نعجِنها لحَدّ ما تِتماسك، وبعدين نِفردها على سِدر كبير ونرُقّها بشكل دائري، وأهم شي تظل ثَخينة، وبعدين نحُطّها بالنار ونحُطّ فوقها الجمر لنص ساعة تقريبًا لحَدّ ما تستوي وتصير قاسية، وبعدين نجِيب سِدر أو صينية كبيرة، ونقطع العجينة قِطع صغيرة، وبعدين نحُطّ فوقها لَبَن المريسة، ونخلُطْها مع بعض لحَدّ ما تِتجانس، وبعدين نذوِّب سَمن بلدي ونصُبُّه فوقها.

بِنجِيب القمح وهو أخضر وبِسَوُّوه الزُّلُم جُرَز (رُزَم)، وبِوَلّعُوا نار وبِيجِيبوا جُرَز القمح وبيِحرقوها في النّار، وبس يِنْحَرِق بِنْلُمّ السّنابِل، وإذا فيه ناس مِشتهي بُوكل منُّه وهو أخضر، يعني فَريكَة خَضرا، وبنُفُرْكُه في إيدِينا وبِنْطَلِّع القمح منُّه وبنُوكلُه.

وإذا وِدنا إيّاه مُونِة لَلطَّبِيخ بِنَّشِّف السَّنابل بعد ما نِحرقها مثل ما هي، وبِندُقّها وبِنَّظّفها من قشرها لَحَدّ ما يظلّ بس القمح، وبنُوخذُه على البابور وبنُجُرشُه، وفي الدّار بِنجِيبُه وبِنقِيم منُّه الطَّحين، وبنِيجِي وبِنْسَوِّي منُّه شُوربة فريكة، وبِنْفَلفِل مِنُّه.