هي أكلة شعبيّة تتكوّن من جَريشة القمح، وتُطبخ مثل الأرز تقدّم مع المَنسف في المناسبات الاجتماعية.

العِيش من الأكل المهم في منطقة الأغوار الجنوبية، ويُستعمل مثل الأرز على المنسف في حفلات الأعراس والعزايم الخاصة.

نجِيب القمح ونجُرشُه ونِعمل منُّه جريشة، وبعدين نِنقَع الجريشة بالماء الساخن لمدة ساعة أو أقل شويّة، وبعدين نِغلي الميِّهْ في قِدر أو طاسة كبيرة على النار، وبعدين بنحُطّ الجريشة في القِدر ونحرّكها بالمِسْواطة أو عْوَاط، وهي عَصَاة من الخَشب زيّ لُوح خشب صغير، حتّى نحرّك كل الطاسة وما يِنحَرِق وما يلزِّق فيها إشي، وبعد ما يِستوي العِيش يُنَزّل ويُحَطّ بجَنْب النّار حتى ما يُبْرُد، وبِنجيب السِّدِر ونحُطّ فيه العِيش، ونحُطّ فُوق العيش خُبز شْراك رَغيف أو اثنين حَسب حَجم السِّدر، وبعدين نحُطّ اللّحم فُوق العِيش، وقبل ما نحُطّ اللّحم نْشَرِّب مَرَقَة اللَّحم فُوق الخُبز حتّى يِطْرَى شويّة، وبعدين يقدَّم العِيش للنّاس حتى يُوكْلُوه.

وطبِيخ العِيش لا زال موجود في منطقة الأغوار الجنوبية هذه الأيام، وأكثر استخداماته في العرس، والنّاس أثناء حفلة العرس يخلُّوا العريس فلان رايِح يُطبخ عيش يوم قْرَاه.

ويوم قْرَى العريس فيه ناس بِعْمَل تشكيلة؛ يعني سِدِر عِيش وسِدِر رُزّ؛ لأنّه فيه ناس ما يُوكل عِيش أو ما يِعرِف العِيش.

وطبخ العيش اكله قديمة بعدها لحد الان وتستخدم في الاغوار .