بِنجِيب القمح وهو أخضر وبِسَوُّوه الزُّلُم جُرَز (رُزَم)، وبِوَلّعُوا نار وبِيجِيبوا جُرَز القمح وبيِحرقوها في النّار، وبس يِنْحَرِق بِنْلُمّ السّنابِل، وإذا فيه ناس مِشتهي بُوكل منُّه وهو أخضر، يعني فَريكَة خَضرا، وبنُفُرْكُه في إيدِينا وبِنْطَلِّع القمح منُّه وبنُوكلُه.

وإذا وِدنا إيّاه مُونِة لَلطَّبِيخ بِنَّشِّف السَّنابل بعد ما نِحرقها مثل ما هي، وبِندُقّها وبِنَّظّفها من قشرها لَحَدّ ما يظلّ بس القمح، وبنُوخذُه على البابور وبنُجُرشُه، وفي الدّار بِنجِيبُه وبِنقِيم منُّه الطَّحين، وبنِيجِي وبِنْسَوِّي منُّه شُوربة فريكة، وبِنْفَلفِل مِنُّه.

العَدَس المَجرُوش: بنُوخِذ العدس الحَبّ بعد ما يِنشَف على البابور، وبنحُطُّه في حُوض البابور، وبِنْبلُّه شْوَيّة مَيِّهْ وبنُجُرشُه، وفي الدار بِنَّسّفُه وبِنَّظّفُه وبنِحفَظُه في عُلَب نظيفة ومسكَّرَة كويِّس، وبِنْسَوِّي منُّه شُوربة عدس مجروش.