السّمن البلدي ما يميزه رائحته الزكيّة وطعمُه الخاص بسبب الأعشاب البريّة التي تُوضع عليه، ويُستخرج السمن البلدي من الزُّبدة البلدية التي تستخرج من عملية خَضّ اللَّبَن. وحين سألنا الحجّة فضّة قالت لنا:

إحْنا بنْقَشّد الزُّبدة عَشان تصِير سمن بلدي.

أول إشي بنحُط الزبدة على الغاز وبنذوِّبْها وبنخَلِّيها تُركُد هناك، وبِنقوم بِنجِيب مِخْشَانة أو مُنْخُل بِنَّخِّل عليه الزّبدة لمّا تُرْكد وبنِقْطفها (قَطْف)، وبنحُطّها في هالطّاسة وبنحُطّها عالمِركب وبنحُوسْها، وعاد اللَّبَن اللِّي طِلع منها هناك بِنَّزّلُه وبنحُطّ عليه ثلج لحالُه.

والزّبدة اللّي غَلَت بنحُطّ عليها حَوايِجْها اللّي هي عُشب؛ إِحنا وقت الرّبيع بنِطلع على البَطِين وبْنِقطفُه وبعدها بِنَّشّفُة في الدّار، مثل: البابونج والعِطِرفان والحُلبة والكُرْكُم.

هسَّا الرَّغْوة اللِّي هي اللَّبَن اللّي زَلِّيناه وحَطّينا عليه الثلج يكون فيه زُبدة بنحُطّ عليها جريشة وبِنْرَجّعُه على الغاز حتى يُطبخ فيه، بعد ما يِستوي بنْسَمّيه (قِشْدة)، والسّمنة اللِّي تركناها ما حطِّينا عليها الحَوايِج بنحُطّها في نُصِّيّة.