من الأكل الذي تأكله النُّفَساء لإدرار الحليب وتقديمه للنّفساء، ونحضر حليب الماعز ونغليه على النار حتى  يغلي، ثم نتركه يبرد شوي، وبعد ذلك بِنجيب البيض البلدي ونضعه على الحليب ونخلطه خلط  جيد ليتجانس مع  بعضه، ونرشّ عليه قليلا من الملح، ويقدم ساخنًا للنُّفَساء.

مِن زمان معروفة الكرك بأكلتها المشهورة (المَنسف)، وإلْها عادات وتقاليد وطُقوس، وعِنَّا أكلة المَنْسَف إلْها عادات وممارسات، ومنها: ما يصِير يقوم الضِّيف على الأكل إلاّ لمّا يقول صاحب البيت: تفضّلوا، افِلْحُوا على المْسَدَّر. ولازِم يقوم الضّيف يِغسِل إيدِيه وبعدها يتفضّلوا الضيوف، ولازم يُقعُد الأكبر بالسنّ، وما يصير مَدّ الإيد على الرّاس اللّي على المنسف إلّا لمّا صاحب البيت يقول: تفضَّلُوا على أكل راس المنسف أو اللّسان، وما يصير يُوكل لَحم من جهة ثانية، وما يصير يفتّ إلَك صاحب البيت لحمة وما تُوكلها وتُتركها لأنُّه معناه إنُّه أكلُه مُو زين.

مربَّى المِشمش هو عبارة عن مِشمِش وسكَّر وليمون، وكما حدَّثتنا المُخبرة عن طريقة عمل مربَّى المِشمش: بِنْقِيم البِذر من المِشمش، وبِنْقَطِّع الحبّة لَنُصِّين، وبنرُشّ عليه سكّر، وبنحُطُّه في طنجرة وبنْغَطِّيه بَس نحُطّ عليه السكَّر لَمدّة ساعتين، وبعدين بنحُطّه على الغاز وبنحُطّ عليه إشي بسيط من المَيّ، وبِنحُطّ عليه عَصْرة ليمون، وبنخلِّيه على نار هادية لمدة ساعة، وبعدين بنطَفِّي الغاز وبنحُطُّه في مَرْتَبانات.

حتّى نعمل مْخَلَّل اللِّفْت بِنجيب لِفت وبنغسله وبنقطّعه لقِطع وبنحُطّه في مَرتبان، وبنجِيب شَمَنْدَر حَبّة أو حَبتين في المَرتبان، وبِنجيب قِرن فُلفل بنحطُّه معهن، وبنحُطّ مَيِّه مع ملح وبنذَوِّبهن مع بعض وبنحُطّهن على اللِّفت، والشَّمندر بِعطي اللِّفت لون زَهري، وبعد ما نحُطّهن في المَرتبان بنِكِبْسُه حتى يصير صالح للأكل.

مْجَدَّرَة البُرْغُل هي عَدس وبُرغُل وبصل وزيت، وكما حدّثتنا المُخبرة عن طَبخ مْجَدَّرَة البُرْغُل: بنجِيب عدس وبنحطُّه في طنجرة وبنحُطّ عليه مَيّ وبنِسِلقُه على الغاز، وبس يِستوي بنصَفِّي المَيّْ عنُّه، وبنحُطّ فوق العدس بُرغل وبنحُطّ علية مَيِّة العدس، وبنخَلِّيه بَس يِغلي، وبعدين بِنْهَدِّي عليه على نَار هادْيِة، وبنحُطّ ملح وبنحَظِّر بصل مقطَّع وبنِقْلِيه مع الزِّيت البلدي، وبَس تِستوي بنحُطّْها في السِّدر أو الصَّحن وبنحُطّ فُوقِيها البصل.

خَلّ التفاح هو تفّاح بنغسلُه وبنقطعه وبنحُطّه في فخّار حتى يتحلّل، وكما تُحدثنا المُخبرة عن طريقة عمل خلّ التفاح: بنجِيب تفّاح أحمر وبنغسله، وبعدين بنقَطّعُه لأربع قِطع، وبِنخلِّي البِذر والقِشر فيه، وبنجِيب جَرَّة فَخّار وبنحطُّه فيها لَمدّة ثلاث أسابيع، بنُعصُره في إيدينا على المِصفاية، وبنحُطّ السائل اللّي بِطلَع منُّه في مَرْتَبان، وهيك بنِعْمَل خَلّ التفَّاح ويصِير صالح للاستخدام.

وهو عبارة عن خُبز عربي يصنع من دقيق القمح والماء والملح، ثم رَقّ العجين على شكل دائري كبير، وكما حدّثتنا المخبرة: بِنَّخِّل الطحين في المُنخل، وبِنحُطّ فوقُه خميرة، وبعدين بنصُب الماء عليه وبنعجنُه، وبِنحُطّ العجين في جاط، ونبدأ بعملية تقطيع العجين قِطع على شكل كُوب، وبنُوخذ الكُرات بنغَطّيها بالطحين وبنحُطّها حتى تِخمر، وبعد هيك بنِخبزها على الصّاج، وهو عبارة عن قِطعة معدنية مساحتها كبيرة، ولازم يكون الصّاج سُخن، بِنرُقّ كل كُرة على شكل دائري كبير بتكون من طبقة رقيقة، وبنحُطّها على الصاج، وبنحُطّ مَسحة زيت لَحتى يمِيل لون الخبز لَلّون الذهبي. ويتميز الشّراك بسهولة هضمه وأكله.

وهو عبارة عن رُز مطبوخ بالسمن البلدي واللحم البلدي، وبنُطبخ اللّحم مع المَريس(لبن الجميد)، وبِنجيب اللّحم وبنغسلُه وبنحُطّها على المصفاية، وبعدين بنحُطّ عليه مَيّ وبنِسلقها على النار، وبس تِغلي بِنشيل الزَّفَرة عن اللحمة وبنصفّيها، وبعدين بِنحُطّ عليها اللّبن وبنحرّك اللبن واللحم بخَشبه طويلة تسمّى (المِثوار)، وأوّل كانوا يحطّوا اللحمة على نار الحطب، بس هسَّا على مركبات الغاز، ويقدّم المنسف على سِدر كبير، بِنحُطّ على أرضيّة السِّدر خُبز شْراك، وبِنحُطّ فوقُه الرُّزّ وبعدين اللحم، وبنُصّ السِّدر راس الذبيجة، وبنحُطّ عليه صنوبر وبنغطِّيه بخبز شراك، وبكون بجَنب الشّراك طاسيّة اللبن (الشّراب)،

بِتكوَّن من باذنجان وبنِحشيه بشطَّة وجُوز قَلب وثوم بِنحُطّ معه ملح، وكما حدّثتنا المخبرة عن طريقة عمل المقدوس: بِنجيب باذنجان حَبّ صغير بِنحُطّه في الطنجرة، وبنِغلي مَيّ وبنحُطّها عليه، وبنخلّيه بس يصير لونه نَهدي، بعدين بِنقيمُه من المَيّ الساخنة، بنِغسلُه بمَيّ باردة وبنحُطّها عليه، وبنِفتح حبّة الباذنجان فتحة من النصّ وبنكَحّله بالمِلح، وبِنخلّيه على مِصفاية حتى يِتصفّى وتِنزل المَيّ منُّه، وبنحضِّر الحشوة وهي عبارة عن شطّة حَمرا وجُوز قلب بنقطّعُه وثوم وملح وبنِخلطهن مع بعض، وبتقعد تِحشي فيه بس نجهّز الحشوة، وبنحُطّه في المرتبانات وبنِقلب المرتبان على وجهُه حتى يزلّ المَيّ الزّايدة، وث

هي عبارة عن عدس ورُز وبصل وزيت، وكما حدّثتنا المخبرة: بِنحُطّ العدس بطنجرة وبِنحُطّ عليه مَيّ، وبنسلقُه وبنخليه بس يِستوي بنصفّيه من المَيّ، وبعدين بنكون ناقعين رُزّ بنخلطُه مع العدس، وبنقلّبُه مع الزيت والسمنة في طنجرة، وبِنحُطّ بهارات وملح عليه، وبِنحُطّ ميِّة العدس عليه، وبنقطّع بصل على شكل شرائح وبنقليه مع الزيت البلدي حتى يِقدح، وبعدين بِنحُطّ الأكل على السِّدر وبِنحُطّ على وجه الأكل البصل.