وهو عبارة عن رُز مطبوخ بالسمن البلدي واللحم البلدي، وبنُطبخ اللّحم مع المَريس(لبن الجميد)، وبِنجيب اللّحم وبنغسلُه وبنحُطّها على المصفاية، وبعدين بنحُطّ عليه مَيّ وبنِسلقها على النار، وبس تِغلي بِنشيل الزَّفَرة عن اللحمة وبنصفّيها، وبعدين بِنحُطّ عليها اللّبن وبنحرّك اللبن واللحم بخَشبه طويلة تسمّى (المِثوار)، وأوّل كانوا يحطّوا اللحمة على نار الحطب، بس هسَّا على مركبات الغاز، ويقدّم المنسف على سِدر كبير، بِنحُطّ على أرضيّة السِّدر خُبز شْراك، وبِنحُطّ فوقُه الرُّزّ وبعدين اللحم، وبنُصّ السِّدر راس الذبيجة، وبنحُطّ عليه صنوبر وبنغطِّيه بخبز شراك، وبكون بجَنب الشّراك طاسيّة اللبن (الشّراب)، وبس يِخلص الشراب بقُوموا المعزّبين بتزويد الضيوف بالشّراب، ولازم يكون الشّراب خاثِر، فيه ناس بتعمل عِيش بدل الرُّز وهو عبارة عن جَريش القمح.