القرصة:

اولا ينخل طحين القمح بالمنخل الناعم

وبنفرز النخالة عن الطحين بالمنخل وبنحط مي وملح

ثم نعجنها بلقن وبضل نعجن فيها حتى تشد، ثم بنصير نقرص فيها وبندملها بالجمر والنار والسكن ( عويص) مش مخمرة

وبعد ما تستوي بنطلعها من الجمر وبنكتها من السكن وبندهنها بالسمن البلدي وبنقطعها قطع ثم تؤكل.

الشاي:

كنا نجيب ابريق الشاي المطلي ونحط فيه كوز مي ونعبيه تاينتلي بعدين بنحطه على النار حتى تقرب المي تغلي.

بنحطله كاسة سكر وبنحط عليه شوية شاي اسود حل وبنتركه يغلي غلوتين ثلاث على النار.

وبعدين بنطيح الشاي بس ينقع ربع ساعة زمن بنصب الشاي بالكاسات وبنوزعو على الضيوف والكم عشان حثل الشاي يترسب (يركد) بقاع الابريق.

المناسبات التي يقدم فيها الشاي:

جميع المناسبات من أفراح وعزاء وزيارات، يقدم للضيوف كمشروب ضيافة ويقدم على وجبة الافطار

وهو يخص ولا يقص من الضيف الكبير نبدأ بالتوزيع.

الجعاجيل:( الشعاشيل)

تأكل اكثر شي في الشتوية.

طريقة العمل:

طحين قمح منخل، بنفقس عليه بيض وبنرش عليه ملح وفلفل وبنجيب عشبة الجعدة بنفرمها اذا كانت خضرا واذا كانت يابسة بنفركها وبعدين بنفرم بصل فرم ناعم وبنخلطه كله مع بعض البعض حتى يشتد شوي وبنقطعها قطع بالأيد وبنسقطها باللبن المغلي وهو يغلي ع النار بنتركها نصف ساعة بتكون استوت بعدين بنديرها بالصدر وبعدين توكل بالخواشيق وممكن باللبن الرائب المطبوخ نعمل فيه فتة.

البحابيث:

اكلة شتوية تعطي طاقة للجسم ودفئ.

المواد:

طحين اسمر، حمص، عدس، دجاج، رب بندورة، بصل، بهارات، سميد، برغل، مصفاية طقطوقة.

طريقة العمل:

ننقع السميد لمدة ساعتين حتى تنفش( تصير طرية) وبنحط البرغل المنقوع في صحن كبير صينية عميقة ( لقن عجين) ويرش عليها طحين بكمية كويسة.

 ثم يرش الماء باليد الثانية وبضل نفتل تي تصير كرات بحجم حبة العدس الكبيرة ومتساوية الحجم

وبالنهاية بنحط كمية كويسة في الطقطوقة ( مصفاية تكون متناسبة مع حجم الطنجرة) وحسب الكمية المطلوبة.

شراب البحابيث:

المشوشة:

تعتبر وجبة افطار رئيسية يوميا طوال السنة، المواد ما كانت متوفرة مثل هاي الايام وعشان هيك كانت الاكلات من اللي متوفر في البيت وحاكورته.

البيض من الجاجة والبصلات من الحاكورة، والزيتات من الزيتون اللي بباب الدار.

المواد:

زيت زيتون، بيض، بصل اخضر، ملح، فلفل، ورص

طريقة العمل:

بنفرم البصل وبنحطه مع الزيت بتقلى ليستوي، وبنحط فوقه البيض وبنحركه شوي مع الملح والورص والفلفل ويؤكل مع خبز الشراك البلدي.

الرشوف الاردني:

هي من الاكلات الشتوية ولكنها تؤكل في أي وقت وهي وجبة غداء على الاغلب.

المواد:

عدس، حمص، بصل، زيت زيتون، لبن رائب، كشك مجفف.

طريقة العمل:

يوضع الحمص بعد النقع على النار بالماء حتى ينضج ( يستوي) وبندير عليه كمية من الكشك والعدس واللبن مع التحريك حتى يغلي وبنحط ملح وبهارات وبنتركه على النار حتى ينضج الخليط ثم نقلي البصل مع زيت الزيتون ونديره على الخليط.

الكباب ( الكبة)

أكلة توكل على مدار العام سواء وجبة غداء اوعشا.

المواد:

برغل ناعم، سميد قمح، قشر بندورة، كشك البندورة ، بصل، زيت زيتون، ملح، فلفل.

طريقة العمل:

بنعجن البرغل مع سميد القمح النية حتى تتماسك الخليط ويكون حجم الكرات بحجم زر الجميد على شكل العدسة المحدبة.

نحط جواتها خلطة البصل وكشك البندورة وبنحطه في مصفاية على القدر ( مثل المفتول) حتى تستوي على البخار

ثم تشوى بفرن الطابون( فرن الخبز).

المكمورة:

وهي اكلة توكل في الصيف والشتاء.

المواد: طحين قمح، زيت زيتون، بصل، دجاج مقطع، ملح وفلفل وبهارات.

طريقة العمل:

يعجن الطحين حتى تصير العجينة ملكة ( العجينة لا رخوة ولا شديدة) ويدهن قاع الطنجرة زيت زيتون

 ثم يرق العجين باليد ويوضع في قاع الطنجرة ،

 يوضع قطع الدجاج والبصل المقلي بزيت الزيتون

ثم بنحط فوقه العجينة وهون بنكون بهرنا الجاج وبنحطه فوق البصل المقلي وبنحط فوقه ملح وبهارات بكميات مناسبة

نضع فوقه طبقة جديدة من العجين وبنرجع بنكرر العملية الي قبل بكل طبقة من العجين

المقرطة:

وهي من الاكلات الشتوية

المواد:

طحين قمح، بصل، زيت زيتون، دبس بندورة، ملح، فلفل اسود.

طريقة العمل:

طحين نرشه بالمي ونفتله على طريقة  .... وبنحطه على جنب لما يجف وبنفرم البصل فرم خشن متوسط وبنحط قليل من الزيت، بنحط (نضعه) على النار وبنحط كمية مناسبة من دبس البندورة لما يبلش يغلي بنسقط المفتول في الطنجرة حتى يغلي لمدة ربع ساعة وهذا بعد ما نحط الملح والفلفل الاسود بالكمية المناسبة ثم يوضع بصينية حتى يبردله  شوي ويأكل.

المطابقة:

المواد: الطحين( القمح)، لحم الضأن مفروم خشنة، بصل، زيت زيتون، ملح وفلفل وبهارات.

سميت هذه الاكلة المطابق لأنها عبارة عن طبقات فوق بعضها البعض.

طريقة العمل:

بنجيب العجين وبنعجنه حتى تصير العجينة علكة ( العجينة لا رخوة ولا شديدة)

بنرقها بالأيد وبنحط عليها طبقة من البصل واللحم المقلي بزيت الزيتون، وبنرد نحط طبقة ثانية من العجين المرقوق بنرد نحط عليه لحم وبصل مقلي بزيت الزيتون وبنحط فيها هاي الطبقات مع بعضها البعض وبنحطها ( نضعها) في الفرن لمدة 20 دقيقة.