يا شايف الزول يا خايب الرجا

يقال هذا المثل للشخص المعتز بنفسة والمتكبر واللي شايف حاله مش شايف غيرة وفعلا من منظرة تفكره شيءقد حاله ولكن هو بالحقيقة ولا شي ولا يسوى شي

اللي بيته من زجاج لا يرمي الناس بالحجارة

يقال هذا المثل بالعادة للشخص الذي يترصد للغير على اقل شيء ويقوم بالتأليف والطعن بالغير من غير علم وذكر عيوب الاخرين وشتم الغير وقذفهم واختلاق القصص الغير الصحيحة والصاقها بهم.

مو من الرمانة بس القلوب مليانه

يقال هذا المثل بالعادة عند اختلاق مشاكل كبيرة بسبب تافه مناسبة هذا المثل او قصته : كان هناك حماة وكنتها بنفس البيت وكانت العلاقة كلها غيرة وحقد وبغض وفي يوم جلب الابن رمانه للبيت وفرحت الكنه بها ولكن اخذتها الحماة واكلتها وعندما رأت الكنه الحماة تأكل الرمانة قامت وشتمتها بكل الالفاظ البذيئة حتى انها ضربتها وتدخلت الجارة مالسبب فقالت الكنه لأنها اكلت الرمانة فردت الحماة وقالت مو من الرمانة لكن القلوب مليانه.

اختلط الحابل بالنابل

عصفور باليد احسن من عشرة على الشجرة

مناسبة هذا المثل: عن الطمع عند بعض الناس او عدم القناعة بما رزقه الله تعالى او عدم الشبع بما عنده وكان يريد ان يكون له كل شيء

قصة المثل: كان صياد قديما اثناء صيده استطاع ان يمسك عصفور حي وفرح بهذا العصفور وكان يسير فرحاً وابتهاجا لإمساكه العصفور حياً واثناء سيرة نظر للشجرة وعليها مجموعة من العصافير تزقزق فطمع بان يمسك العشرة فافلت العصفور من يده وصعد للشجرة وعندما اقترب من العصافير طارت جميعها وطار العصفور اللي بيده فخسر الواحد والعشرة

(ام ناصر) المره يومن تتجوز وما تغسل تفوتها شهر وتقعد شهر وشهرين خلص ونها حامل تضل حامل لتسع تشهر لا تروح ولا تجي ولا تفحص ولا اشي تا يهل التاسع تقعد تسع تشهر وعشر ايام وما تدري المر وش فيها غير تا تلد وتشوف ولد ولا بنت

لومن كانت المره تحبل وبدهم يعرفوا ولد والا بنت يجيبوا خيط ويحطوه على بيت نمل اذا النملات سحبنه جوى معناته ولد لانه الولد بظل ليك اما اذا طلعنه برى معناته بنت لانه البنت بتروح لغيرك

بعد ما تلد الولاده يجن النسوان يزورنها وكل وحده تجيب معها نقوط اللي الله يقدرها عليه اللي تجيب بيض اللي تجيب رز اللي تجيب سيرف او صابون واللي تجيب قرش او خمس قروش او عشر قروش واللي تجيب ذراع قماش وكل حلو العرب حلاوه سطول حلاوه يكون ابو المولود   جايبها ومحضرها قبل ما تلد او بعد ما تلد

الصبح .يجن النسوان يدونن ويشربن قهوة وياكلن سمن وحلاوه وخبز ويسون للولاده قرص عجه ويغيرن للعيل ويلفنه ويحطن بين اجريه حرث اللي تكون امه مغربليته من بيت الخلند تراب احمر نظيف عشان العيل ما يسمط ويكحلونه وينيمنه

بالزمانات وزي ما بذكر كانوا اهل عين جنا يسووا حفله لومن الناس يجيها ولد ينبسطوا كثير قد الله ما يعلم وكانوا يقولوا اجانا الرزق ويعني هالحجي اجانا مين يشتغل ويجيبلنا الرزق ولومن يطهروا الولد اتذكر مره امي اخذتني معها كان فيه طاوله بالنص وولد صغير لابس ثوب عليها كان الولد يعيط لويش بدريش بس  كنت اسمعهم يباركوا لاهله ويقولولهم الله يطعمكوا من نفعه وصارن النسوان يلفن حوالين الطاوله وواحده منهن معاها دف صغير وتدق عليه وتصلي عالنبي وكنا احنا نلف مثلهن ونسوي زي النسوان وكان الاكثرية لابس ابيض هسا لومن بذكر هذاك اليوم بقول ااتعدنه يوم الحساب استغفر الله العظيم

القهوة:

 ادوات القهوة (معاميل) الى هي الدلال، البكرج،  الطباخ،  المهباش، الفناجين، المحماسة، موقد (مصدر نار) المبردة.

بنحمس القهوة بالمحماسة ، للمحماسة  يد للتحميس بعد ما نحمسها على النار والنار تكون هادية وتؤخذ القهوة لونها ما بين الشقار والسمار

توضع القهوة بالمبردة وتبرد، بعدين بنوخد كمية( حفنة) وبنحطها بالمهباش وبندقها لما تصير خشنة ومش ناعمة كثير.

بتكون المي غلت بالطباخ بنحط فيه القهوة المدقوقة بالمهباش بكمية معقولة

 وبتبلش غلي على النار بنراقبها حتى ما تفور لما توخذ لونها القريب من الشقار والسمار.

اللزاقيات:

ينخل الطحين بالمنخل الناعم نخالة نحطها للجاج.

والطحينات المنخلات بنحط عليهن ملح وخميرة وثم بنعجنهن بلقن العجين وبنخليهم رخوات شوي ( غير شديدة)

وبنحطها وبنلزقها على الصاج.

وهي ع الصاج بنلزقها تلزيق لما نحسها انه الوجه استوى بنقلبها على الوجه الثاني.

لما تستوي بنقطعها شقف صغيرة

وبنحط عليها شاي وحليب وسمن بلدي مع شوية سكر وبنخلطها مع بعضها البعض، وبعدين توكل وتسمى هذه الاكلة فتة اللزاقيات.

او اللزاقية مثل ماهي بندهنها بالزيت او السمن البلدي وبنرش عليها شوية سكر وتؤكل كما هي.