استمارة رقم 95

خبز الصاج :طبعا خبز الصاج ما نقدر نستغني عنه لأنه اشي اساسي بالمنسف وكمان نستخدمة لعمل (اللزاقي ) بس يكون أطول شوي وأسمك شوي وكمان فيه خبز ينفت بالسمن البلدي والسكر ونسميه (المفروكية) وفي (المصلَى ) عجين مخمر طبعا نغمس فيه تغميس على الاكل ،والصاج أشي أساسي من مستلزمات البيت وعادة المرأة تفضل إنه تعمل (خبز الشراك) عن غيره من انواع الخبز لأنه أسهل أشي وأطيب كمان .

وخبز الشراك عبارة عن طحين ومي ورشة ملح ينعجن مع بعض وينترك عشان يتخمر لمدة ساعة بعدين ينرق على الصاج .  

استمارة رقم 153

لماذا سمي خبز الصاج

سمي خبز الصاج لانه كان يخبز على الصاج في البيوت وكان كل بيت بدوي فيه صاج وفيه طحين لان الخبز كان العنصر الاساسي للاكل عند البدو ولا زال .

يتكون الخبز من طحين القمح او من الشعير احيانا تعجنه النسوان في الصاج بدون وضع الخميرة وهذا اسمه خبز الفطير اي ليس متخمر وبعد ما يرتاح تقوم المرأة بتقطيع العجين الى دوائر على قياس الصاج وتفردها على الطحين لترتاح .

ثم تشعل النار وتضع الحجارة على الاطراف وتضع الصاج وهو عبارة عن اداة مصنوعة من الحديد المطلي غير قابل للصدأ وهو على شكل نصف دائرة مقوس من الوسط وبعد ان يحمى الصاج تفرد المرأة قطعة العجين وترقها مع الطحين ثم تقلبها على معاصمها حتى تكبر وتتوسع فتفردها على الصاج وتقلبها حتى تنضج .

استمارة رقم 108

كنت اصحى من النوم الصبح مو على صوت المنبه او احد يصحيني كنت اقوم من النوم على ريحة الخبز الي ما رح ذوق شي بهالدنيا ازكى منها وهذا طبعا اول فجة الضو.

انا واي بدوي تلقاه يعشقك خبز الصاج لان له عندنا مكانه خاصة ويذكرنا بامهاتنا ونشاطهن وخيرهن الزاكي

بالليل امي تجيب المعجن وهو لقن او جاط تحط فيه طحين القمح البلدي وتعجنه وتضل تعجن لمن يصير معها العجين لين وتقوم على الغرفة وتحطه وتغطيه للصبح عشان يخمر وتروح تنام وبالصباح تقوم الفجر تجهز الحطب وتولع النار وتحط الصاج لمن يسخن وتكون مجهزة العجين ومقطع اقراص وظل ترق بالعجين وتحطه على الصاج عن يستوي وبعدها نفطر وهو ساخن مع مونة الدار زيت ولبن او جبنه ولا شي ازكى منها.