زراعة السّمسم تكون بعد زراعة القمح والشعير في فترة، بعد ما يجهّزوا الأرض ويحرثوها يكُربُوها ويِثنوا ويثَلّثُوا إذا كان على الدروب، ويجِيبوا البذار؛ بذار السّمسم وقت موسمُه، وبِتكون الزّراعة في شهر واحد أو في شهر اثنين حسب قوّة السنة؛ لأنه ما بِبدُوا في الزّرِيعة إلا إذا عرفوا إنّه موسم المطر كويّس. وبِطلَع في الصيف لأن الزّرِيعة الصيفي بَدها شِتَا كويّس، وبعد ما يِكبر الزرع ويِستوي قرُونُه يصير فيها سمسم مِستوي يِقلعُوه من الوَطَاة ويوخذُوه على الدُّور، ويكونوا مجَهّزِين إلُه فراش إمّا على ظهر الدُّور أو في الحُوش، المهم محلّ نظيف بعيد عن الحَلال والتراب، بِيجِيبوا السمسم المحصود وبحُطُّوه على الفراش في المقلوب مِشان بس يِنشف ويحرّكُوه يْحِتّ السمسم على الفراش، وبس يخلّصُوا السمسم من العْرُوق يقِيموا العِيدان بَس ما يظلّ فيها العرُوق، وينظّفوه كويّس ويتركوه في الشمس حوالي شهر لَحَدّ ما يقَرقِش ويلمُّوه وينظّفُوه من التِّبن، ويصيروا يخبُّوه في أكياس ويخبُّوه ويستعملوه في المُونِة مثل إنّه يخلطُوه للزَّعتر، وفي الأقْرَاص وغِيرها من الأكلات، وكانت الناس يُوم تحتاج إشي من عند التاجر تُوخذ حفنة وتبدّلها عليه في أيّ غرض يحتاجونه، واللّي كانوا يزرعوا السمسم قْلال مو كثيرين، على شان هيك كان هديّة غالية إذا المَرَة أخذتُه واجِب.