لمّا بِبَلِّش موسم الحصاد وبِطِيح الزَّرع، بُرُوح راعِي الزَّرع وبُوخِذ معه يا إمّا عُونة، أو مْرَابْعِيّة، أو عُمّال، وبِبَلّشُوا يُحُصدوا الزّرع كلّ واحد معه مِنجَلُه، وطبعًا الحصاد بِبَلّش من الفجر إلى أذان المغرب، وبُحصُد وجه أو وِجهين لمّا يصير الصبح بتريَّحُوا وبِفِطروا، وبعدين بِرجَعُوا للشُّغل لأذان الظُّهر، بِصَلُّوا لأنُّه الشمس بِتكون حامْيِة عليهم. وهمّا بُحصدُوا بكونوا بِغنُّوا أغاني:

 مِنجَلا ومَن جَلاهْ            راح للصّايِغ جَلاهْ

ما جَلاه إلّا بْعُلبةْ             والعُلبة صارت دَوَاهْ

مِنجلِي يا بُو رَزِّهْ              وِيش جابَك من غَزِّهْ؟

جابَنِي لِعب البناتْ                   البنات المدَلَّلاتْ

يا سايِق النديّة مطوِّل              سَلِّم على جارِةَ الوادي

دَربَك يا محمّدْ على ناعور                  ع مَّ البَساتِين نادِي

وَاشرَفتَ اَنَا عالِيَ المِرقابْ               مِن ظِيقِةَ الصَّدْرِ يا بْنَيَّةْ

رَبِّي بَلانِي بْعَرِيض كْتَافْ                وَالزِّينِ ما دَبَّرُهْ حَظِّي

ولمَّا يخَلّصُوا حصاد بِكونوا مْجَمّْعِينُه (حِلَل)، وبِبَلّشُوا يْغَمّرُوه، وبِيجِي التَّرَكْتر بِرَكِّب عليها التّرُلِّهْ، وبنِجْمَع كلّ المحصول على البِيدر، وبتِيجِي الدَّرَّاسة وبتُدُرسُه، وتطلّع الحَبّ لَحَال والتِّبن لَحَال.