بِنجيب القمح بِنغَربلُه وبنَّقّيه وبنّظّفُه من الحجار والشَّعير وبنحُطُّه وبنسلقه في قِدر مع مَيّ على النار، وبِظلّ يِغلي لَحَدّ ما يستوي، وبنخلّيه يطوِّل، وبنِيجِي بنِنْشلُه من المَيّ وبنحُطُّه في مَصَافي وبِنكون جايبِين مَلاحِف نظيفة وبنحُطّها على الحِيط على ظَهر الدار، المهم محلّ نظيف عالي مِشان يِنشف، وبنِفِردُه وبنظلّ نقلِّب فيه كل يوم، وفي الليل بِنجِيب غَطَا وبِنغطّيه عن النَّدى، والصُّبح بنِفتح عليه وبِنظَلّ نسوِّي هيك كلّ يوم لحَدّ ما يِنشف ويصِير مقرقِش، وبنلمُّه بعدين وبِنعبّيه في شوالات وبِنودّيه على البابور، وفي البابور لازم يكون المحلّ نظيف، وبنرُشّ عليه مَيّ، وبنظلّ نفُركُه كثير وكويّس، وبنحطُّه في الجاروشة وبجُرشُوه لِينا.

وبس نُوخذُه على الدار بنَّنَخْلُه في المُنخل لحَدّ ما تروح الدُّقَّة مِنُّه (طحين ناعم)، وبعدين بِنَّشْفُه على سِدر لحَدّ ما يِنشَف كويّس لأنّه إذا ظلّ فيه رطوبة بِخرَب وبِدَوِّد وبِنظُبُّه في عُلَب وكْيَاس نظيفة، وبنُطْبُخ منُّه مجَدَّرَة وبُرغُل، وبُرغُل وشْعِيرية، وكُبَّة، وأكلات كثيرة.