كانت الناس زمان تشتغل كل إشي على النار، وبعدين طِلعن البوابير، ومو كل الناس عندهم بوابير لأنها على الكاز، والحطب أوفر من الكاز، وبس تقدَّمت الأمور صار الكلّ يجيبه ويشتغل عليه، وهو صغير ومريح، مصنوع من النحاس وإلُه 3 رجلين ومَركَب بنْحَطّ عليها الإبريق، وإلُه راس وإلُه عين اللّي بِيطلع منها الكاز مشان يولِّع، وإذا سكَّرت بِنسَوِّيها في إبرة البابور، وإلُه ضَرَّابَة على الجنب محلّ ما بنحَطّ الكاز، مشان نِدفِش البابور ويطلع الكاز لفوق ويولِّع البابور، وهو نُمَر؛ فيه نُمرة واحد، ونُمرة اثنين، ونُمرة ثلاث.