أول إشي بِنجِيب الحليب وبنِغليه، وبعد الغلِي بنروّبُه؛ يعني بنحُطّ عليه لبن رايب أصلا وبنتُركه4 ساعات، وبعدها بنِقسم الرُّوبَة قِسميين، وبِنحُطّ قِسم في الثلاجة حتّى يكون بارد، والقسم الثاني بطلّعه برَّا وبَشيل عنّه الغَطَا وبحُطّ عليه قِطعه شَاش عن الغَبَرة وبتُركُه حتّى يُبرد لَحالُه، وبعدها بِصير عندي نُصّ بارد ونُصّ دافي، وبحُطّهن مع بعض في الخضّاضة، يعني نُصّ ساعة حتّى تِستوي الخضّة وتِطلَع الزُّبدة، حتى نِجمَع الزُّبدة بنحُطّ مَيِّهْ باردة أو ثلج لمّا نتأكّد إنّه بلَّشَت الخضّة تِطلِع رغوة مِش زُبدة تكون  خِلصت الخَضّة وأخذنا زَفَرْها، وبعدين بنحُطّ لَبن الخَضّة في قِدر على الغاز، لمّا تبلِّش تبيّن المَيِّهْ الصّفرا  بِنديرُه  في المِخلاة لمّا تِمتلي مزبوط، وبعدين بنحُطّ المِخلاة في بُكَس بلاستك مخَرّمَة لمّا يِتصَفَّى، ولمّا تِتصفَّى لَيُوم بِنديرُه في شاشة بنحُطّ عليها ملح وبنِعجنُه في ملح، وبظلّ مَرصوص كمان يوم، وبعد يوم  بنديرُه في جاطات وبِنزَعمْطُه، بكون (جَبْجَب)، أوّل إشي بنِعجنُه مع ملح حتّى نزَعِمطُه في الإيدين وِاحْنا  بِنلِفّ فيها وبنمَلّسْها في شويّة مَيّْ حتّى ما تكون خشنة، بعدين بنحُطّه على شاش أبيض نظيف في محلّ   كويّس حتى يِنشف ويصير جَميد جاهز للطّبيخ.