وهي أكلة عند البدو مشهورة جداً، وطريقة صُنعها حسب ما تقول أمّ علي: القِشدة تَنتُج معنا لمّا نصنع السمن البلدي بِنجيب كميّة كبيرة من الزُّبدة اللّي بتِطلع معنا من الخَضِيض، وبنحُطّ الزُّبدة في قِدر كبير وبنحُطّ القِدر على المِرْكَب، وهو غاز ذو عين كبيرة يتم الخبز عليه على الصاج.

وبعدين بنحُطّ كمية كبيرة من الجَريشة فوق الزبدة، تقريباً ثلاثه كيلو، ونحُطّ كُرْكُم كثير عليها، وبنخَلّيها تغلي مدة طويلة، ساعة أو أكثر، وبعدين السمن كلُّه بِتصَفّى في أعلى القِدر، ونقوم بأخذ السَّمن بمِغْرَفة كبيرة من الوجه، أمّا الجَريشة فكُلّها تِتراكم وتترسَّب في قاع القدر، ونقوم بغَرْفها بملعقة كبيرة وبنحُطّها في صحن، وبنُوكِلها في الملاعق ساخنة أو باردة عادي.