هي أكلة كنّا نسوِّيها أيام زمان؛ أيام الوِدْيان، وهي بَس صاحب البيت يِذبح  ذبيحة، بتِيجي مَرَتُه وبتُوخِذ اللِّيّة  والشَّحمة اللِّي على الذّبيحة، وبِتنظّف اللِّية من الدّم والشَّعر وبتِغسِلها وبِتقَطّعها لَقِطع زغيرة، وبِتوَلّع النّار عليها، وبِتنَظِّف الصّاج من السَّنا والسّْخَام اللِّي عليه من جُوَّا مُو من بَرّا، وبِتخلِّي الصاج بَس يِحمَى بتحُطّ الشّحمة عليه وبِتقَلّبُه، وبس يذوب الشّحم بِظَلّ منُّه قِطع زغيرة، بِصِير لونْها ذَهبي وهَشّة، بتُوخِذها المَرَة وبتحُطّ عليها خُبز ورايب وسمن.