بِنجيب الكَرشة من السوق أو لمّا تِنذبح الذبيحة، بنُوخذ كَرشتها وبنغسلها كويّس؛ بنُفرُكها بالملح والليمون لحَدّ ما تصير تِضْوِي ضَوِي، ما نشِمّ إلْهَا رِيحة، وبنِيجي بِنقَطّعها قِطَع لَحَالهِن، وبِنخَيِّط كل قِطعة لَحالها، وبقُولوا ليها شَخْتُورَة، وبِنكون مْسَوّيِين إلْها حَشوة من رُزّ ولَحمة وسمنة وبْهارات، وبنِحشِي كل وحدة وبنخَيّطها من عند بابها، وبِنجِيب السّكّينة وبنِحشِيها مشان يِستوي الأرز واللحمة، وبنحُطّها على الغاز وبَسلِقها بالمَيّ أول مرّة، وبِنكُبّ عنها، وبرجع بِنحَطّ عليها مَيّ وبنِرجِعها على الغاز وبنُطبُخها على المَيّ، وبِنكون مارْسِين لَبن جَميد وبنحُطّه عليها، وإذا حبِّينا بِنجِيب خبز وبنفتُّه في مَيِّة الكَرشات، وبعدين المَصارين بِنجِيبها وبِنّظّفها وبنِفْتَحها من جُوّا، وبِنكون منظّفين الظّْلاف وقايمِين الشَّعر عنهن، وبِنشَلْوِطْهِن على النار، وبنلفّ المصارين عليهن، وبنحُطّهن مع الكَرشات مِشان يِستَون مع الكرشات، وهاي الأكلة أزكى من كل الأكلات مع إنّه شَغلتها متعبة، وصحتين وعافية.