بِنجِيب القمح النَّظيف المنَقَّى من الشَّعير والحَبّ الثاني، وبِنحُطّْها في لَقِن نَظيف، وبِنبِلّْها مَيّْ؛ رَشّ بِنرُشّ عليها، وبنُفرُكها كويِّس في إيدِينا، وبنُوخِذها بِنْوَدِّيها البابور وبنخلِّيه يُجرُشْها، بَس ما تكون ناعمة كثير، وبس نرُوح على الدّار بِنَّخِّلْها في المُنْخُل وبِنقِيم مِنها الدُّقَّة (الطَّحين)، وبِنَّسِّفْها على سْدُورَة أو جَلايِل مِشان نْقِيم منها القِشرة، وبنِرجَع بِنَّسِّفْها على جَلايِل نْظَاف مِشان نْشِّفْها كويّس وما يظلّ فيها رطوبة؛ لأنها بتِخْرَب وبِتْسَوِّس، وبَس تِنْشَف بنحُطّْها في عُلَب نظيفة ومْسَكَّرَة، وبنِرفَعها على السّْقِيفة أو المَسْطَبة، وبَس وِدْنا بِنطُول وبْنُطبُخ منها عِيش على لَبَن مَخِيض (شَنِينة) وشُورَبَة حامْضَة وغيرها.