بِنقوم أول إشي وبنَّظِّف القمح البلدي، وبعدين بنِنقعُه في الميّة ساعة، وبعدين بندُقّه بالجُرن، وكل دار في القرية فيها جُرن، والجُرن بنسوّيه من الدّمُوس الزَّلَط، وبيجِي الزَّلمة بِسَوّي فيه جُورة من النُّصّ وبسوِّي ليها مَدَقّة اللّي هي دِمْس، وبعد ما تدُقّ المَرَة القمح أول مرّة بنُوخذُه وبنذَرِّيه مشان القِشرة تْطِير منُّه، وبنِرجع بندُقّه مرَّة ثانية حتّى يصير لا هو خِشن ولا ناعم؛ نُصّ نُصّ، وبعدين بنُخُلْطُه مع العدس وبنُطبخه على نار الحطب، وبعد ما يِستوي بنصُبّ عليه اللبن البلدي، وبنِقدَح علية بصلة وسمنة بلدية، بس تِستوي بنصبُّه في السِّدر وبتُوكلُه العِيلة.