السمنة: بِتجيب الحليب اللّي بنِحلبُه من الحلال، وِاحنا قبل ما كُنّا نِغلي الحليب عويه يه وبنحُطّه على السقا، وبنُمْرُس اللَّبن عشان يصير رايِب، وبنحُطُّه في الحليب السقا، ونجِيه الصبح وِانّه صاير رايب، وبخُظُّه في الخَظّاظة وبنحُطّه فيها لَثاني يوم، وهي حامية عليه بنحُطّه فيها على شان تصير الزُّبدة كايفة، وبنطلّعّه وبنخُظّه وبتِطلع الزّبدة عَجَال، والشّنينة بنحُطّها في قِدر نحاس كبير، وبنحُطها على ثلث حجار ونحُطها على النار لَمَنها تِغلي، وبنحُطها بكِيس كبير قماش، وبعد كِيس القماش بتصِير جامدة لمّا تدَحِبريها في إيدْكِ وبِسوّنها جَميد، واللّي عنده زيادة بِبيع، والزُّبدة اللّي بتِطلع بنذوِّبها على النار وبنخشِّنها، وعشان الشَّعر بنحُطّ في المِحقان شُوك عشان يلزِّق فيه الشَّعر، وبعدين بنِغليهن وبنحُطّهن على النار وبنجيب شويّة جَريشة وبنحُطّ عليها ميِّه، وبيكون على الزُّبدة لَبن وبتحُوسي الجَريشة، وبعدين بتنَزّلي هالسَّمنات وبتخلِّي الجريشة والسّمنات في (المَرو)، والمَرو هذا بسوّنّه النّساوين من جِلد الغنم وبِنَظّفنّه وبحُطّن فيه سمنة.