كانت النّاس زمان ما تِهْتَمّ إنّها تِزْرَع شَجَر، اللِّي كان يهِمّْها هو إنّها تْربِّي غَنَم وبَقَر وبَس، وكانت النَّاس ما عِندها شَجَر زيتون ولا غيرُه، وكُنّا يُوم وِدْنا زِيت زيتون ترُوح النّاس على الطفيلة، وتُوخِذ مَعها قمح أو مصاري؛ الموجود عِندها، ويرُوحوا على الدوابّ يقُعْدُوا ثلاث أو أربع أيّام حَسَب ما يِقْضُوا حاجتهم، ويِشْتَرُوا الزِّيت ويرَوّحُوا، والزِّيت كان نادِر في الدُّور، والنَّاس كانت ترُوح تْجِيبُه خاصَّة في وقت الصيام؛ لأنُّه ما بِصِير تُوكل أكل عليه سمنة، بَس زيت؛ لأنّه نغمِّس منُّه مع زَعتر، وكانت النّاس يُوكلوا زِيت ويْهِدُّوا الحِيط. وكمان كُنَّا نحُطّ قَنديل الزِّيت قِدّام العَذْرا أو المسيح؛ لأنّه لازم الزِّيت تِنوي على الصَّلاة، يُوم النَّفْسَا ترُوح تْزُور الصّلاة؛ لأنُّه الخُوري بِضْوِي قناديل من الزِّيت، ولَحَدّ الآن كَمان بنحُطّ الزِّيت على المَكابِس. والأيام هاذِي ما بِتْلاقي دار تِخْلى من شَجَر الزيتون؛ لأنُّه فيه ناس بتِعْتبره تجارة صاروا يِقِطْفوه ويبيعوه في تْنَاك، صار كل سنة أغلى من سنة وصِرنا إذا بَدنا نِقْطِف نْجِيب ناس تِقْطِف لأنّه بدُّه معونة، الحمد لله لأنُّه نعمة من عند الله.