بِنجِيب العِنَب الأشقر، يا بِكُون عالشَّجَر عِنَّا أو بنِشْتَري من السُّوق، المُهِم بنِغِسْلُه وبعدين بنِستَنّاه يِنْشَف مَزبوط، وبنِقِطفُه خَصْلة خَصْلة، يعني بِنْخَصّْلُه وبنْحُطُّه على الطَّاولة، وبنْحُطّ تحته شرشف نظيف، وبِنْغَطِّس كل خصلة ناشفة بالزِّيت، وبنحُطّْها على الشَّرشف إللّي فَرَدْناه، كلّ كميّة العِنب الموجودة عِنّا، وبَظَلّ أقَلّبُه في الشّمس لمّا يِنشَف العِنَب ويِتْغَيَّر لُونُه للأحمر، والعرُوق تِنْشَف مزبوط.

وبعدين بِنَّظْفُه من العرُوق، وبنحُطُّه في كِيس قْمَاش، وبِنْعَلّقُه في مكان مْهَوَّى مزبوط (هذا زَبِيب وقتي يعني مستعجل)، أمّا الزّبيب لِلتَّخزِين بِنْغَطِّس القْطُوف في المَيّ، وبَسْ يِنْشَف في الزِّيت، وإذا بَدْنا إيّاه زَبيب فاتِح لُونُه نُنْشُره في الظِّلّة لمّا يِنْشَف، وإذا بَدْنا غامِق بنحُطُّه في الشَّمس وبِنْظَلّ نْقَلِّب.