بِنْبَلِّش نْسَوِّي خَبِيصَة بعد ما يصِير العِنَب أشقر بنِقْطِف العِنَب وبنِغِسْلُه، وبَعدين بنِقْطَع العِنَب حَبّة حَبّة وبنِغِسلُه وبْنُتُرْكُه يِتْصَفَّى، بنُعْصُر العِنب وبنْمَرِّرُه من مِخْشَانِه، وبنُوخِذ من العِنب المَعصور كَميّة صغيرة قَدَر مِكْيالِين في عُلبة اللَّبَن الصغيرة، وبنِرْجِع الباقي في الطُّنجرة على الغاز، وبعد ما يِتغَيَّر لُونُه بِنْذَوِّب شْوَيّة طحين أو سَمِيد حسب الموجود، وبِنْحُطّه في الكميّة الباردة، وبنُخْلُطها كويِّس، وبنحُطّها على العِنب الفاتر، وبنحَرّك فيه وهو على النار، لمّا يصِير ثَقيل بنحُطّ فيه لَحْشِة قْرِيش ويانْسُون وحَبّة البَرَكة، وفيه ناس بتحُطّ مَعاه الجُوز المَدقوق حَسَب الموجود، وبِنْجِيب شَرْشَف نَظِيف وبِنَّظِف سَطْح الدَّار، وبْنِفْرِد شَرْشَف أوّل والشَّرشَف الثَّاني فُوقُه؛ شَرْشَفِين فُوق بعض، وبنُوخذ طُنْجرة الخَبِيصة وبِنْحُطّْها في وسَط الشَّرْشَفِين، وبْنِفْرِد فيه بمِلْعَقَة خَشَب حتَّى يِتْسَاوَى على الشَّرْشَف، وبنُتُرْكُه لمَّا يِنْشَف مَزبُوط، بِصِير رَقِيق وبِنَّزِّل الشَّراشِف وبِنْجِيب إسفنجة نظيفة وماء الورد مع المَيّ، وبِنْصِير نْغَمِّس الإسْفنجة وبْنِدْهَن الشَّرْشَف اللِّي عليه الخَبِيصة، وبعدين بِنْصِير نِقْطَع فِيها، وبعدين بِنْغَمّسُه حَسَب ما بَدُّه الواحَد، وصِحّتِين وعافية.