أكثر إشِي بنِسْتَخدمُه فيها النَّشَا، والنَّشَا زَمان كُنّا نْسَوِّيه في البيوت من الجَرِيشة (القمح المطحون)، نِنْقَعُه من اللِّيل لَثَاني مِن يُوم، وبِنْخَلِّيه على بِين ما الجَريشة تُرْكُد في القَاع ونُعْصُرْها ونِطْلِع مِنها النَّشَا، أمّا هَسَّا يا بْنَيِّي كُلّ شِي صار جاهز في الأسواق.

بِنجِيب النَّشَا وبِنْحُطُّه في مَيّ بارْدِة (بِنْذَوّبُه) وبِنْحُطُّه على الغاز، وبِنْظَلّ نْحَرِّك فيه بسرعة بسرعة لمّا يصِير لُونُه فاتح شفَّاف ويِجْمَد، بِنْحُطّ عليه سُكّر مَطحون على الهادي، وبِنْظَلّ نْحَرِّك فيه بسرعة، وبَعدين بِنْحُطّ أيّ طَعم (نَكهة)، ومِثل ماء الورد كَمان كُنّا نْسَوِّي في الدُّور، وبَعدين بِنْجِيب صينيّة وبنِدهَنْها زِيت أبيض وبِنْحُطّ فيها اللِّي سَوّيناه في الطّنجرة، وبنْمِدُّه زَيّ ما وِدْنا، وبَس يِنْشَف مزبوط (ثاني يُوم بِنجِيب سِكِّينة ماضية) وبنِدْهَنها زِيت، وبَبَلِّش أَقَطِّع فيهان وبَرُشّ عليها سُكَّر مطحون، أمّا أنا بَحِبّ النَّشَا أحسن من السُّكّر؛ لأنُّه السُّكَّر بِكَبْتِل، أمّا النَّشَا بِظَلّ مَفْرُود عليها، وبعدين بِنْحُطّْها في صحون بلاستيك أو وَرَق، وكُنَّا نْسَوِّيها يوم عِنَّا مُناسبة أو عيد.