***

أهم ما يميز الفحيص كروم العنب، كانت زمان كلها مساحات واسعة من كروم العنب البلدي الأسود والأبيض، كانوا ستات البيوت يعملوا كل شي من العنب، ويخبوا مونة لفصل الشتاء، مثل الزبيب دبس، نبيذ، طبيخ عنب، خل، خبيصة (ملبن)، عصير عنب، ويستخدموه بسهراتهم والأعياد واحتفالاتهم.

لكن هاي الأيام صار الكل يشتري من السوق لعمل كل هل المنتوجات، لما بدنا نعمل الدبس بنشتري من السوق العنب الأبيض، دايما بكون عمل الدبس في نهاية الموسم أحسن، على شان يكون طعم العنب حلو، بتجيب العنب وبنفرطه وبنقيم منه الحبة الخربانة وبنخلطه على البلندر، وبنصفيه بالمناخل، نوخذ مية العنب ونحطها بطناجر ونخليها تغلي غلوة واحدة ونطفي النار تحته، ونخليه يهدا شوي على بين ما تترسب الشوائب اللي بيه، ونصفيه بطنجرة ثانية باليانس (شاش ناعم)، ونرجع نغليه على نار هادية مرة ثانية ونحركه، كل شوي نقيم الرغوة اللي بتصير على الوجه في بداية الغلي بالكفكير المخزق، بظل طول اليوم هو على النار، ونظل نحركه كل ربع ساعة لما يصير كثيف كثير، نطفي تحته النار ونخليه يركد شوي، وبعدين نفرغه بمرطبانات قزاز ونخزنه للشتاء، مانبحط عليه أي نوع نكهات أو بهارات، وبكون أزكى إذا نحط بجنبه صحن طحينية أو نخلط الدبس مع الطحينية، أكله شتوية ممتازة بتعطي طاقة.

***

ينقى العنب من الحبات المضروبة, لا يختار إلا السليم منها, نغسل حبات العنب جيدا بعد فرطها من العناقيد، توضع في جاط كبير ونقوم بفغش (عصر) العنب جيدا بحيث لا تبقى أي حبة صامدة, ثم نقوم بإزالة القشور والبذور ونأخذ العصير فقط، حيث نقوم بتصفيته بمنخل لا يسمح إلا بمرور العصير فقط، نضع العصير في طنجرة على النار ويبقى إلى أن يغلي ويصبح متماسكا قليلا، ونتذوق إذا كان بحاجة للسكر، يترك على النار قليلا ثم ينزل ويترك ليبرد، ثم يفرغ في مرطبانات ويوضع على وجهه زيت زيتون ويحكم إغلاقة ويحفظ في مكان جيد التهوية.

يؤكل مع السمن أو الطحينية أو لوحده، ويعطي طاقة، لذلك يعتبر مخزون للشتاء