***

أشتري العنب الأسود البلدي بكميات، لأني بعمل النبيذ وببيعه، بنقي كل حبة بحبتها، بقيم الحبات الخربانة وبغسله مليح وبفرده على شراشف بلاستك على ظهر الحيط بالشمس لمدة أربعة أيام، إذا بدي النبيذ مدة سبعة أيام، إذا بدي اياه حلو، وبعدها بخلطه بالبلندر وبخليه خشن، وببيعه براميل بلاستيك، كل برميل ثلاث أرباعه، بخلي فيه فراغ على شان العنب بفور، وبغطيه بإحكام لمدة أربعة أيام، على بين ما يطلع كل الغازات، وبفتح عليه وبحركه على شان تطلع كل الغازات لبرا، وبرد أسكره بإحكام مرة ثانية لمدة أربعين يوم، وبعدها بفتح عليه، بكون النبيذ بطفو لفوق والشوائب مترسبة تحت، (والنبيذ حساس لازم يكون كل الأدوات اللي بستخدمها للنبيذ نظيفة وناشفة مليح من المي، لأنه إذا وصله نقطة مي وحدة بخرب كل النبيذ وبتحول لخل، وبتعامل معه بهدوء حتى واحنا بنصفي بيه)، بوخذ النبيذ بصفيه بيانس بجاط كبير، ولما يهدا شوي بفرغه بقزايز نظيفة ومعقمة، وبخزن بمكان رطب إلي شوي، وببيع الباقي وخصوصا بعيد الميلاد ورأس السنة الميلادية، بتظل الشوائب بكبها، وبيظل بقاع الجاط شوي بتركهن ليوم ثاني حتى يتصفن، بعد ما أصفيهن بظل الطحل وبكبه.

***

نلم العنب الأسود والأبيض البلدي آخر الموسم, يترك بعناقيده, نزيل الحبات الخربانة منه، ونغسله جيدا, وننشره في الشمس من يومين إلى أسبوع, إذا أردنا أن يكون مز -يعني مش حلو- ينشر يومين أو ثلاثة أيام, وإذا أردنا أن يكون حلو ينشر أسبوع، يجب أن يكون هذا العنب حلو, لأنه إذا كانت فيه حموضة فسيكون في النبيذ شعطة حامضة.

نلم العنب المشرور بجاط ويفغش باليد أو بالخلاط الكهربائي، ثم يوضع في براميل بلاستيك بحيث نترك في البرميل مساحة ومجال للنبيذ لكي يفور ويتخمر، يغطى بأحكام لمدة أربعين يوما أو شهرين، يخمر العنب بعناقيده وببزره بمكان معتم ورطب, وبعد أن يتخمر نزيل هذه العناقيد والبزر التي تطفو على السطح باليد، (طبعا يجب الاهتمام بأن اليد يجب أن تكون جافة تماما، لأن النبيذ إذا وصلته نقطة ماء واحدة فسيتلف ويتحول إلى خل)، نصل إلى طبقة النبيذ الصافية, نزلها في دلو ونتركها إلى أن تركد قليلا، ثم نفرغه بزجاجات ونغلقها بإحكام بعد تعبئتها, لكي لا يدخل إليها هواء، تبقى آخر طبقة في البراميل وفيها يكون النبيذ المحرحر (مركز)، نضعه في خريطة نظيفة ونعلقها في مكان عالي ونضع تحتها جاط لتجميع النبيذ على مهل, تترك لمدة يومين تقريبا, ثم يكب ما تبقى بالخريطة، وما جمع يفرغ في زجاجات.