هاي من العادات الي احنا النسوان بنبدع منها والي بنعبر فيها عن فرحتنا ببشاره أو مناسبه حلوه والزغاريت بنعملها بالاعراس وبحفلات الخطبه ولما بنكتب كتاب واحد من أولادنا بعد ما يكتب الكتاب بدخل على امه واخواته وببلشوا يزغرتوا وفي كلام وحكي بنحكي لما نزغرت في الحفلات والاعراس وخصوصاً لما يفوت العريس على الصاله " أويها يا ناس صلوا على النبي وعلى فاطمه بنته الك الحمد يا ربي والي طلبته نلته" وبعدها الزغروته وبعدها "أويها يا ريتو مبارك يا عريس جديد ريتو مبارك كل جمعه وكل عيد"و     "أويها ريتو مبارك شيد ما عملنالك أويها والعشبه اليابسه تخضر قدامك"  وبعدها الزغروته والزغاريت بتعبر فيها النسوان عن فرحتهن بكل مناسبات العيله مثل المولود الجديد والعرس والخطبه وحتى لما يكون الواحد بعيد عن امه ومش شايفته الها مده يعني يكون مسافر أو يكون بمكان ثاني اول ما تشوفه بتبلش تزغرت والزغاريت اكثر اشي بعملها النسوان من سن ثلاثين وفوق والي صاير هاي الايام انو صار في شباب تقلد النسوان في الزغاريت في الاعراس ما كانت موجوده زمان