أول ليلة في رمضان وأول أيام الشهر إلُه عادات وتقاليد قديمة وجديدة عند الناس وعند أهل المزار، يعني من العادات في ليلة الغُرَّةْ إنّه إذا فيه عريس جديد بِنْعَزم عند أهله، أو بِنْعَزم عند أهل مرته، ومن عادات الناس إنه بِيجوا أهل الخير وبذبحوا ذبايح يوم الغُرَّةْ، قبل الظهر بكونوا ذابحينهم وبقطعوهن وبوزعوهن على الأهل والقرايب والناس الفقراء.

أمّا بعد الإفطار فبيجوا الناس وبلتمُّوا عند دار واحد بعد صلاة التراويح، وبتعلّلوا وبتذكّروا أيام رمضان القديمة والقصص القديمة، وبُوكلوا القطايف والحلويات، وبتمدّ التعليلة لوقت متاخر من الليل.