عيد الفطر هو أوّل يوم بعد رمضان، أوّل إشِي بِقوموا الناس لصلاة العيد، وبس تخلص الصلاة بِعايْدُوا الناس على بعضهم، وبروحوا على المقبرة بقرأوا الفاتحة على قبورهم، وببلّشُوا  يلفُّوا الجيران على بعض وبروحوا على محارمهم (بناتهم وخَوَاتهم اللّي مِتجَوّزات)، وبِعايدوهن وبلمُّوا العيديَّات عند دار أهلهم وبقعدوا وبسولفوا وبتذكروا أيام زمان وعادات الناس زمان.

النّسوان قبل يوم العيد بجهّزن المعمول والحلو والراحة والقهوة السادة مشان يضيّفوا اللّي بيجيهم. ويُقال في عيد الفطر (تقبَّل الله طاعاتكم، وكلَّ عام وأنتم بخير)، أمّا الأطفال فبِلبسوا لِبس العيد الجديد، وبلفّوا على قرايبهم وجيرانهم، وبِعطُوهم قروش عييديّة.