عيد الضحيّة أو العيد الكبير، وهو العيد اللّي بِيجي بعد عيد الفطر بسبعين يوم، وإلُه نفس عادات عيد الفطر، بس إنّه في عيد الضحيّة بضحّوا الناس في كبش أو خروف أو أي شي ثاني بوافق عليه الشرع، والناس بتروح قبل العيد وبشتَروا الخِرفان وبسمّنُوهِن وبِطعمُوهن واللّي عنده حلال بِربِّي مِنهن خروف وبِذبَحُه أوّل يوم أو أول ثلاثة أيام.

قبل يوم العيد بكون نهار الوَقفة، وَقفة الحُجّاج على جبل عرفة، وبصوموا الناس فيه وبظلوا يستغفروا ويدعو من ربّنا.

أنا متعوّد كل سنة أنوي للضحيّة وأربّي خروف وما أحلق لِحيتي ولا أقصّ أظافري، ويوم العيد بعد ما أسلّم على أهلي وجيراني أروح أذبحه عند الدار وأوزّع شويّة من لحمته، والباقي بطبخه للناس الموجودين عنا.