يسوِّنها في العادة النّسوان من طينة ويجبلنها مع التِّبن مشان تظل قويّة، ويمَلّكِنْها كويّس ويجِبلِنها العصر وبِشتَغلنها الصُّبح، وبِتكون الكْوَارَة مَحَلّها جَنب الدّار من جُوّا، بِظَلّن كلّ يوم بِعَمّرِن قَدر ارتفاع شِبر، كل يوم دُور مِشان يِنشف الدُّور الأول ويِحمِل بعضُه لَحَدّ ما يصير ارتفاعها مترين، ويسَوّن إلْها مِن قدَّام باب مْدَوَّر اللّي تِقدَر المَرَةْ تمِدّ إيدها فيه مِشان تْطُول طحين أو عدس أو أي شي من المخزون فيه. ومِن فوق بتحُطّ إلْها قُصِّيب وبِطَيّنِن عليه، ويخلُّوا باب مْرَبّع تربيع اللّي يِقدَروا يدِيروا منُّه المُونة في الكْوَارَة،

وبعدين يِستعملنها لنَهْض الفراش (الفَرْشات واللُّحُف والمَخَدّات)، وأحيانًا إذا كان محلّ الكْوَارَة كبير يقسّمُوها لأكثر من قِسم ولأكثر من نوع.