طبعًا البْذَار بِصير مثل الحْرَاث؛ بِنجِيب خِيش (قطعة شْراط قْماش)، وبِنسوِّيلْها حَبلِين من كل طَرَف يَمين ويَسار، وبِنحُطّ حَبلِين في النُّصّ كَمَان، وبِتعَلّق في الرّقَبة، والحَبلِين الأولانِيّات بِتعَلّقن في الخَصر، بنِيجِي بنْقَطِّع الأرض على الفَدَّان أو التركتر حسب الموجود، وبنقَطّع الأرض مشان نسَيطِر على البْذَار، ويمشي الشخص اللّي وِدُّه يُبْذُر في نُصّ القْطَاع اللّي سوِّيناه، وبُضرُب مرَّة على اليمين ومرَّة على الشمال مشان (البْذَار/ الحَبّ) يِلْحَق بَعْضُه ويكون مْوَزَّع كويِّس، وبنِرجع على القْطَاع الثاني وبنظلّ على هالموَّال لمّا تِخلص الأرض والقْطاع اللّي قَطّعناهِن.