بعد ما نِفصِل الزُّبدة عن اللّبن المَخِيض بِنشِيل الزُّبدة على جال، قُلنا قبل إنّه الزبدة بنسوّي منها السمن لما نذوِّبها وبِنجِيب لبن المخيض وبنحطّه في مخلّة كبيرة وبيكون مجمّعينُه وبنحطّه على النار عَبِين ما يِثقل اللبن ويِطلع المَصل (سائل أصفر)، وما لازم نحرّك اللّبَن وهو على النار إلا لمَّا نِعزِل عنُّه المَصل وبنسَمّيه الجَبْجَب، كنّا نخُضُّه في قَرفَعة أو لِسْقا، واللّسقا نسوّيه من جِلد الحَلال، والجَبْجَب هو لَبن يثقّل كثير، بنِعجْنُه وبنضِيف إلُه الملح، وبنِعجنُه في الإيدين جُوّى جَاط كبِير (لَقِن) حتّى يِتْماسَك مع بعض، بعدين بِنقَطّعُه في الإيد كُتَل وبِنْسَمّيه (دِمْس)، وبعدين بِنْزَعِمْطُه كِيف المثلّث الدائري، وبنحُطّ الزّعامِيط فوق شُقَف أو ورق على لُوح الخشب، وبنخلّيها في الشّمس حتى تِتنشَّف ويِطلع منها الملح، وبنوزّنُه في الرّطل وبنبِيعه، وبنخلِّي إلنا مُونِة لَلطّبيخ  ..... وسلامتكو.