تُحُلبِي العَنز وبِتروّبِي الحليب مثل اللّبن الرّايب لمّا يصِير خاثِر في السّقا اللّي هو مِن جِلد الغَنَم، وبَس يرُوب اللَّبن بتحُطّيه في السِّعِن، والسِّعِن هاذا جِلد الشّاة بَس كْبِير، بِنعَلّقُه على الرُّكّابَة والرُّكّابَة ثَلَث عِيدَان من الخَشَب، بِتعَلّقي السّقا فِيهن واللّبَن بُكُون جُوَّاتُه، لَمَن يصِير مِثل البَلُّون، وبتُعُصْبِي بابُه، وتقومِي بتِقْظَبِيه من أدِيه الثِّنْتين وبتخُظِّيه زِين، وبِين حِين وحِين بتِفتَحِيه وبِتدِيرِي سَحْلة مَيِّهْ باردة مِشَان الزُّبدة تِجْمَد، وبعدين بِتحُطِّي إيدكِي جُوّا بِتْلايْمِي الزُّبدة على بَعظها وبِتحُطّيها على جَال، وبِتزِلِّي اللَّبَنَات في القِدر، وبتحُطّي القِدر فُوق ثَلَث لَدَايَا على النار، وبِتخلِّيه شويّ وبَعدين بِتدِيرِيه في المِخْلاة، بعدين بتُعُصْبِي المِخْلاة وبتحُطّيها على صَفَاة نظيفة، وبِتجِيبي دِمْس ثقيلة بِتحُطِّيها فُوق المِخْلاة مِشان المَصِل يِطلع، بعدين بَس يِتمَصّى من المَصل بِنطُولُه من المِخْلاة وبنحُطّ معه ملح وبِنْزَعِمْطُه، وبتُنشُرِيه على ظهر البيت لمّا يِنشَف ويِطلَع مِلحُه.