تُحدّثنا المُخبرة عن إحدى أنواع المعقود التي اشتُهِرت فيها محافظة الكرك، تُحدّثنا عن طريقة عَمل  مربّى العنب: كانت الناس تِشتري أو على الأغلب تلقِّط العنب اللّي كثير مِستوِي، وتُفُرطُه حَبّ وتِغِسلُه،  بعدين بِتجيب قِدر كبير وبتحُطّه فيه، وما بِنحُطّ سكّر كثير، وبِنخلّيه على نار هادية، على بِين ما يِعقِد  ويصير زَيّ شكل سائل ثقيل، وبعدين بِنجيب مُنخُل خِشِن عشان نْصَفّي القِشرة والبِزر اللّي فيه، وبنِرجَع  بنحُطّه في القدر وبِنخلّيه على بِين ما يِثقل، طبعًا إلُه اسمين: الثّقيل منُّه اسمه (عِنَبيّة)، والخفيف اسمه (دِبس عِنب).