الصاجِيّة هي أكلة كثير زاكية، واللّي بِجَرِّبها مرّة لازم يعِيدها، بِنجيب اللّحمة وبنِسلقها وبنحُطّها على النار، بنحُطّ معها بهارات وبصل، وبِنكون مجَهّزِين الفحم؛ على الفحم أحسن، وبِنجيب الصّاج وبِكون نظيف، وبنقَعّدُه فوق الفحم، يعني الجِهة المْجَوّرة لَفوق مِشان بس يِستوي اللّحم نديرُه في الصاج، وبِنكون حاطِّين شويّة سمنة مشان نِنْشِل اللحمة من المَيّ ونحُطّها في الصاج مع البصل، وبِنظَلّ نْقَلِّب فيها لَحَدّ ما تِتحَمَّر كويِّس وتكون أخذَتْ لُون وطعم زاكي، وبتِتّاكَل مع الخبز البلدي، ولو كان شْراك بكون أحسن وأحسن.