بنِنْقَع السَّميد البُرغل الناعم ونجِيب لحمة حمرا غنم أو عِجل، وبِنجِيب البُرغل بعد ما ننَظّفُه ونْصَوّلُه وبِندُقُّه هو واللّحمة مع بعض في جُرن الكُبّة لَحَد ما يِخْتَلطن مع بعض، وبِنصير نسوِّيها دوائر في إيدينا وبنِفتَحها من النُّص وبنِحشيها في الحشوة اللّي بنكون مجَهّزينها من الأوّل؛ لحمة وبصل وبنِقليها، وبعدين بِنكون مارْسِين لبن الجَميد، وبَس يِغلي على الغاز بِنجيب الكُبّة اللّي جَهّزناها وبِنْسَقّطها في اللَّبَن، وبعدين بنِطفِي تحتها، وإذا بِنحِبّ بنِشويها بالصّينية طبقة لحمة وبُرغل وبنحُطّ الحشوة، وبعدين كمان طبقة لحمة وبُرغل في الفُرن، وبِنكون مقَطّعِينها قبل ما نِشوِيها.