تُحدثنا المُخبرة عن طريقة عمل المَدقوفة، أول ما بِنطول القمح وبِنّقّبُه وبنذَرِّية، وبعدين بندُقّ القمح في الجُرن، وبندُقّه بأول دَقّة لمّا تِطلع قشرتُه، وبعدين بِنْقُوم عليه بنُنْشُره بالشمس، وبِنعاوِد بندُقّه مرَّة ثانية حتى يِطلع لُبّ القمح.

وطريقة الدَّقّ حتّى نْطَرّي حبّة القمح، وبعدين بنذَرّيه وبِصير جاهز للطبخ، وإذا بدنا نسَوِّيه بنفس اليوم بنِنْقعَ القمح المَدقوق لمدة ساعتين؛ حتى القمح عند الطبخ يِستوي بسرعة، وبعدين بنحُطّ على القمح المدقوق ميِّة مع شويّة عدس حَبّ وبنِغلِيهن مع بعض، وبنُمْرُس لبن جَميد وبندِير المَريس على القمح والعدس وبنُتُركه لمّا يعقِد اللّبن، وبنحُطّ على الوجه سمنة وبصل.

وبعض الناس بفتُّوا مَعاها خبز عَويص وبنِفِردُه على سِدر وبنزَيّنُه بالسمنة البلدية.