الفتّة فيه ناس بِسمّيها مْجَلّلة، وفيه ناس بِتسمّيها مشَوّطة أو فطيرة، وبتكون خبز عَويص مع اللبن والسمن، بس تِعجن المرَة الطحين بِتخلّي العجينة جامدة شويّة مو طريّة كثير ولا يابسة من مرَّة، وبتِخبِزها على طُول في الطَّابون بدون ما تِخْمَر يعني خبز عَويص، أو في النار يعني بِتولِّع النار، وبس تُهْجُم بتِرمي العجينة جوَّاها مثل القُرص، وبتغطِّيه في الجمر وبتُتركِيه نصّ ساعة، وبعدين بتقلبُه على الوجه الثاني لَمَنُّه يتحمَّر، وبعدين بِصيرن النّسوان اللّي في العيلة يفتّن الخبز قِطع زغيرة، وبنحُطّ الفَتّ في السِّدر، وبتكون غالية اللّبن لحالُه وطابخة البندورة مع البصل وحاطّة عليها اللّبن، وبحُطّ الخبز المفتوت على اللّبن، وبِتظلّ تحُوس فيه بالمِثوار لَمَنُّه يِطْرى مثل العجينة، وبعدين بنحُطّه في سِدر كبير أو سِدر كان عِنّا من النحاس، وبِنضيف عليه سمنة بلدية أو زُبدة، وبتِتجَمَّع العِيلة وبُوكلوه في الإيد.