هي حلويات لأنه ما كنّا بنِعرف الكنافة والهرايس سواليف هالأيام، كانت الحرَيّرة أحسن إشي بِنسوّيه أيام العُربان، بِتجيب المَرَة الحليب وبتِغليه على النار، وبتحُط على الحليب شويّة سكّر وطحين بلدي، وبِتصير تحوسُه في المِثوار وهي على النار، كانت المَرَة تسوّي الحرَيّرة في قِدر مشان توكل العرب كلّها، وبِتظل تحوس فيه وهو على النار، وبتظل تحوس فيها لَمَنْها تِجمد، وبعدين بِنْطَيّحها من على النار، وبنحُطّها في صحون، وبنحُط  عليها سمن بلدي، وبنِعطيها للعيال يوزّعوها على العرب، أو إذا كنّا في القَرايا على هالجيران، وعْيالنا وزُلُمنا بتُوكل منها وهي فاترة أكثر إشي، كانت النّسوان تسوّيها في الشتويّة مشان تدفِّي الأوادم، وكمان في رمضان بعد الفطور.