طَبخ الحَطَب بِنقول لِيه: (الشُّغُل على النّار)؛ يعني كل شُغلنا بِنسَوّيه على النّار، وبِنكُون مْسَوّيِين مَركبة مِن حديد لِيها ثلاث رِجلِين، بِنْوَلِّع النّار وبنْحُطّْها فُوق النّار، والحَطَب بنكون جايبِينُه من الظّْهَار مِشان النّار، وهو من الشِّيح والوَسْبَا، وإذا راحُوا على المُوجِب بِجِيبُوا حَطَب السِّدِر والبُطُم أو رَتَم... هالموجود، ويْشُقُّوه في الشّلح مِشان يِتْكَسّر، والحَطَب اللِّي إلُه قَرَامِي يكون نارُه قويّة مِشان الخبز على الصّاج، وبِستعملوا شجر الشِّيح أو الوَسْبَا وبُحُطُّوا عليه الطَّبيخ أو القهوة أو الشّاي، أو بُحُطّن النِّسوان عِيدان حَوالي الطّابون مِشان يجَمِّر ويصير فَحم، ويحُطّنّه في مِنقَل زْغِير من الطِّين مِشان غَلْي الحليب وسَلْق البِيض، يعني للشُّغل الخَفيف، وبِتلاقِي زمان طبِيخ العْرُوس أو الميِّت بحطُّوا قدُور اللَّحم على النار، وتطَوَّرت الأمور في بَوابِير، وبعد سنين طويلة صار في غاز ثلاث عيون، لَحَدّ ما وصِلْنا لَلِفْرَانِة، وهي كبيرة ومريحة.