الخبز في منُّه أنواع: الخبز الخامِر بنِعْجِن الطّحين ومِنْكُون حاطِّين الخَمِيرة، وكانت الخَميرة زمان بنْخَلِّيها من (قطعة عجينة زيدة) في صَحن العَجِين مِشان يِتخَمّر فيها، بنِعْجِن في اللّيل أو من الصُّبح حَسَب الوقت اللّي وِدْنا نِخبز فيه الخبز، وهذي العجينة بنِخْبِزها في الطّابون أو الفُرن.

الخبز الفَطير: بنْنَخِّل الطَّحين وبنِعِجْنه بَس بِدون خَميرة، لأنّه بنِخِبْزُه في وقت سريع، يعني طَوّالي بعد ما نِعِجْنُه.

خُبْز الشّراك: بِتْكون العَجِينة طريّة بنْنَخِّل الطَّحين وبنخَلِّي العجينة طريّة بدون خميرة، وبِنْجِيب الصّاج وبنحطُّه على النّار، وبنقَطِّع العجينة وبنقَسِّمها على إيدينا، وبَس تصِير كبيرة بنحُطّْها على الصّاج، وبَس تِسْتَوي بتقلِبْها المَرَةْ في سِكِّين وبتحُطّْها على الطَّبَق.