تُخبرنا رِيما عن المَندَل وتقول: الناس كان عندها اعتقاد إنّه أمور غامضة يُمكن كَشفها على يد صاحب المَندَل؛ يعني شخص بِعرف بهِيك سوالِيف وبِبَيّن إلْهُم صورة المتّهم في فنجان من زيت زيتون، فكان مثلاً لما يصير سِرْقة أو أي إشِي ينادوا الشخص اللي بعرف في المَندَل ومارَس قبل هالمَرَّة في شُغل المَندَل، الناس كانت ترُوح عند الشخص وتِفتح في المَندَل، هذا الشخص اللّي مارَس في المَندَل بِبيّن إلْهُم الأشخاص اللّي سرقوا، وصورة  الشخص اللّي سرَق، طبعاً فيه نِسوان بِآمْنِن بْفَتح المَندَل، وفيه ناس ما بِآمِن بفَتح المَندَل.