تستخدم نساء الرِّيف أنواعًا مختلفة من الخَرَز المرتبط  ببعض المُعتقدات الشعبية، وسألت الحاجّة ثريا سالم البلوي عن ذلك، فقالت:

الخَرزة الزَّرقا، وهي عن العِين بحُطُّوها على الطفل الصغير، وفي مدخل الدّار أو في السيّارة مِشَان العِين ما تيجِي عليها، هاي الخَرَزة فيها لُون أرزق ثاني مْخَالِف، وأحياناً بحطُّوا كَفّ وفِيه خَرَزة زَرْقَا.

خَرْزَة الحْلُوق: وهاي الخَرَزة بِعَلّقوها على اللّي نازلات زَلَاعِيمْها (بَنَات إذِنْها).

خَرْزَة الحَليب: لونها سَكني مع أبيض، وبتعلِّقها المَرَةْ الرضَّاعة في رَقبتها مِشان يدِرّ الحليب للطّفل.

خَرْزَة السّملّك: وهاي الخَرَزة بتِحْمِلها المَرَةْ حتى يظَلّ جُوزْها مِتعلِّق فيها وما يفارقها، ويقولوا عنها: احملِي السّملّك وجُوزِك غِيرِك ما يِمْلِك، وهي طويلةْ سُودَا فِيها لُون أبيض.

خَرْزَة الرّعَاف: لُونْها على لُون الدّم، وفيها لون أبيض، وبعلّقُوها على اللّي بِتْرَعَّف كثير وبِظَلّ الدّم يِنْزِل.

خَرْزَة الِكْبَاس: وبِتعلِّقها المَرَةْ عليها أو على الطفل حتى ابنها ما يِنْكَبِس.