الشّبِّةْ بتِنْشَرَى من عند العطّار، وهي كويسة كثير، واحنا المسيحيّين ما في دار بتِخلى منها لأنه اِحْنا بنِستخدما يوم واحد بِحِسّ حالُه إنّه عِين صابَتُه، بِجيب الشَّبّةْ وبِتكون قِطعة صغيرة منها قَدْ حَبّة  القْضَامَةْ وبِنْحُطّها على الغاز، طبعاً لازم يكون مصلَّى عليها؛ لأنه أحَدْنا أيام عيد الفِصح ولِيلة صلاة 12 إنجيل، بِنْحُطها في الصلاة،ـ وبصلِّي عليها الخُورِي، مِشان هيك لمّا وِدنا نْدِير على وَحدِة شَبّةْ بنِكْسِر منها كِسرة صغيرة، وبنِصْلِيها على النّار وبِنكون مْوَلّعين فَحم مِشان نحُطّها عليها أو على حديدة على راس الغاز، وإذا كان عليها عِين تِطلع الشَّبّةْ مثل شَكل العِين أو وجه الشّخص اللّي صابُه في العين، وكمان فيه ناس تِستخدم الشَّبّةْ عشان تْقِيم رِيحة العَرَق، بس طبعاً هاي القِطعة ما بِكون مْصَلَّى عليها، طبعاً بتكون قطعة كبيرة، وهي كويسة كثير وفوائدها كثيرة.