القهوه كل إشي لِينا؛  لأن البيت اللّي ما فيه  قهوة مُرَّة ما فيه حياة، وبِنسَوِّيها  الصّبح  أول ما نقوم  من النوم،  وبِنَّادي على الجارات  وبِنصير نِشربها ونسُولف عن  الدنيا،  وبنجيب القهوة الخضرا  من السوق، وقبل يوم كنّا في بيوت الشعر كان  واحد يِجي على حمار نسمّيه  (الدوّاج) ونشتريها منه، وأحسن  قهوة كانت القهوة العدنيّة  من عَدَن كانت طيبة  كثير، وبِنّقِّيها من الوِرْش وبِنوَلّع النار وبعدين بنْحُطّ المِحماسة عليها ونولّع النار في الجورة اللي بنحفرها في الأرض، وبنحُط  حَواليها ثلاث حجار نسمّيها) اللَّدَايا)، وبعد ما تِحمى المِحماسة نحُطّ القهوة ونبلِّش في تَقليبها حتى يصير لونها بُنِّي فاتح أو لمّا تصير شقرا،   وبعدين بنحُطّها في المبرِّد اللّي بنسوّيه من الخشب  مثل  الصندوق الزّغير ولِيها فَتحة،  وبعد ما تبرد بنحُطّها في المِهباش ونحُطّها في الهاون وندُقّها زِين،  وكانوا  يغنّوا  لمّا يدقّوا القهوة  حسب  ما قال لِينا المصدر،  ومن هالأغاني:

 على القَدم يا عمِّي بِضيوف اَهَلْنا، على القَدم يا عمِّي

 زايلاتِ الهَمِّ يا دْلالَ اَهَلْنا، زَايلاتِ الهمِّ

   وبعد ما ندُقّ القهوة  بنِغْليها شوي، وبعدين بنحُطها في الدّْلال الكبيرة نسمِّيها المِصفاة،  ونحُط فوقِيها البْهَار  المطحون ونتركها على جَنب لمّا تِتْصفَّى، وبعدين  نصُبّها في دَلّة زغِيرة.  وهيك بِنكون خلَّصْنا تِسواية القهوة،  وقبل ما نصُبّ لأي واحد  بِنذُوقها حتّى ما يصِير حَكي،  وحتى  نشُوف إنُّه البْهار مِطْعِم،   وبعد ما نصُبّ للحاضرين بنِرْجعها على طرف النار حتى تظلّ ساخنة  وما تبرد؛ لأنه القهوة الباردة بِنقول لِيها صَايدة أو فاترة.